Fëmijët në Maqedoni kanë konsumin më të ulët të frutave në Evropë, 31.2 përqind e tyre janë në mbipeshë
Plot 31.2 përqind e fëmijëve në Maqedoni janë mbipeshë, dhe 13.7 përqind e tyre jetojnë me obezitet – tregojnë gjetjet e studimit të Iniciativës Evropiane për monitorimin e obezitetit tek fëmijët, të cilat u publikuan sot nga Instituti i Shëndetit Publik (ISHP) me rastin e Ditës Botërore të Obezitetit.
Gjetjet tregojnë sfida serioze që lidhen me ushqyerjen dhe peshën trupore tek fëmijët e moshës 6 deri në 9 vjeç.
“Sipas studimit, 31.2 përqind e fëmijëve janë mbipeshë, dhe 13.7 përqind e tyre jetojnë me obezitet – që është mbi mesataren në rajonin evropian, përkatësisht 25 përqind dhe 11 përqind. Mbipesha dhe obeziteti janë më të zakonshëm tek djemtë krahasuar me vajzat”, deklaron ISHP.
Vetëm 25 përqind e fëmijëve hanë fruta të freskëta çdo ditë, që është konsumi më i ulët ditor i frutave në rajonin evropian. Njëzet përqind e fëmijëve konsumojnë perime të freskëta çdo ditë – që është gjithashtu ndër nivelet më të ulëta në Evropë. Ushqimet e kripura hahen nga 40 përqind e fëmijëve – më shumë se çdo vend evropian i përfshirë në studim nga Iniciativa evropiane për monitorimin e obezitetit te fëmijët.
Më shumë se gjysma, ose 51 përqind, e fëmijëve konsumojnë ëmbëlsira tre ose më shumë ditë në javë.
Sa i përket aktivitetit fizik, 40 përqind e fëmijëve kalojnë më shumë se dy orë në ditë para ekraneve – televizorit ose pajisjeve elektronike, 63.3 përqind e fëmijëve ecin ose ngasin biçikletën për në shkollë, ndërsa midis atyre që jetojnë brenda 2 kilometrave nga shkolla, ky zakon praktikohet nga deri në 89 përqind.
“Shumica dërrmuese, ose 88.6 përqind, flenë të paktën nëntë orë në natë, 94 përqind e fëmijëve kanë të paktën një orë lojëra aktive me intensitet të moderuar deri në të fuqishëm çdo ditë, dhe 48.2 përqind luajnë aktivisht sporte ose kërcejnë për më shumë se dy orë në javë”, shtojnë gjetjet e studimit, të raportuara nga ISHP.
Studimi vëren se ka një ndërgjegjësim të ulët midis prindërve për njohjen e mbipeshës dhe obezitetit tek fëmijët. Për më shumë se gjysmën e fëmijëve që jetojnë me mbipeshë ose obezitet, prindërit e perceptuan peshën e tyre si brenda kufijve të rekomanduar të “peshës normale të trupit”.
“Këto rezultate nxjerrin në pah nevojën urgjente për ndërhyrje sistemike në mjediset shkollore dhe familjare të fëmijëve, me qëllim nxitjen e rritjes dhe zhvillimit të tyre të shëndetshëm. Ndërhyrjet janë të nevojshme edhe në fusha të tjera – riformulimi i ushqimit, informacioni në lidhje me ushqimin, reklamat, mjedisi urban dhe mundësia për të praktikuar lëvizje të sigurt dhe aktivitet fizik janë vetëm disa prej tyre“, shton Instituti i Shëndetit Publik