Dha dorëheqje kryetari i KRRE-së, Marko Bislimoski
Kryetari i Komisionit Rregullator të Energjetikës, Marko Bislimoski, dha sot dorëheqjen, mëson Deutsche Welle. Bislimoski e informoi kryetarin e Parlamentit në një letër këtë mëngjes se po tërhiqet nga pozicioni në të cilin u zgjodh për herë të parë në qershor 2018. Bislimoski nuk i përmend arsyet e dorëheqjes së tij. As ai dhe as bashkëpunëtorët e tij nuk duan të komentojnë mbi vendimin. Për momentin, mund të spekulohet vetëm për arsyet, duke pasur parasysh se mandati i dytë pesëvjeçar i Bislimoskit përfundon në qershor 2028, transmeton Portalb.mk.
Pak më shumë se dy javë më parë, Drejtoria e Policisë Financiare (DPF) ngriti padi penale kundër Bislimoskit, nën dyshimin për abuzim me pozicionin dhe autoritetin zyrtar. Në padinë e paraqitur më 29 janar thuhet se Bislimoski dyshohet se nuk ka vepruar në përputhje me Ligjin e Energjisë dhe nuk ia ka revokuar licencën kompanisë “Triterol Petrol” DOOEL Shkup në kohën e duhur, edhe pse ajo nuk i plotësonte kërkesat për tregtimin e naftës dhe karburanteve. Licenca dyshohet se duhej të revokohej në janar 2024, por procedura u ndërpre me vendim të paligjshëm dhe licenca u revokua vetëm në prill 2025.
Kjo i lejoi kompanisë të operonte për rreth 15 muaj të tjerë dhe gjatë asaj periudhe ajo arriti një xhiro prej mbi 3.15 milionë eurosh dhe një përfitim të paligjshëm pasuror prej rreth 229 mijë eurosh.
Bislimoski tha në një konferencë për shtyp se do t’ua vërë në dispozicion të gjitha informacionet institucioneve kompetente për të vërtetuar se nuk është kryer asnjë shkelje e rregulloreve ligjore në procedurën për revokimin e licencës së kompanisë.
“Në periudhën e ardhshme, do të ndjek të gjithë procesin dhe nuk do të lejoj që emri im të njolloset në asnjë mënyrë. Gjithçka që është në dispozicion do t’u paraqitet institucioneve. Jam plotësisht i bindur se do të vërtetojmë se nuk ka pasur shkelje as të Ligjit të Energjisë dhe as të Rregullores së Licencimit”, tha Bislimoski.
Në nëntor të vitit të kaluar, Policia Financiare ngriti padi penale kundër dy menaxherëve të “Triterol Petrol” dhe kundër kompanisë, me dyshimin për falsifikim dokumentesh dhe abuzim në një procedurë prokurimi publik.
Bislimoski dhe Komisioni ishin objektiv i shpeshtë kritikash dhe sulmesh politike gjatë së njëjtës periudhë.
Në vitin 2020, VMRO-DPMNE atëher në opozitë organizoi edhe protesta para selisë së KRRE-së në Shkup për shkak të rritjes së çmimit të energjisë elektrike.
Në vitin 2022, Bislimoski u ankua se veçanërisht gjatë pandemisë së koronavirusit dhe krizës energjetike të shkaktuar nga agresioni rus kundër Ukrainës, ai “ndihej si krimineli më i madh në vend” për shkak të sulmeve të vazhdueshme.
“Ne u sulmuam veçanërisht për çmimet e derivateve të naftës, dhe unë madje u ngjita në postera nëpër Shkup dhe u ndjeva sikur isha krimineli më i madh në vend. Dhe pastaj thashë se ishte lajm i rremë”, tha Bislimoski në vitin 2022.
Në tetor 2021, Bislimoski ishte gjithashtu shënjestër e një sulmi fizik nga Arijanit Xhaferi, djali i ish-zyrtarit të BDI-së Musa Xhaferi dhe pronar i kompanisë së furnizimit me energji elektrike “U Power”. Arsyeja e sulmit ishte procedura për heqjen e licencës së kompanisë së Xhaferit nga REQ.
Marko Bislimoski po vijonte mandatin e tij të dytë pesëvjeçar si kryetar i KRRE-së. Mandati i tij i parë ishte nga qershori 2018 deri në qershor 2023, dhe ai u rizgjodh në këtë pozicion në korrik 2023. Ai ka punuar në KRRE që nga themelimi i saj në vitin 2004.