Çfarë pasurie ka deklaruar Izet Mexhiti, njëri ndër liderët e VLEN-it?
Kryetari aktual i Komunës së Çairit, Izet Mexhiti, është një nga dy kryetarët e koalicionit qeverisës VLEN, i cili u bë parti. Bashkëkryetari tjetër është Bilall Kasami, kryetari aktual i Komunës së Tetovës, transmeton Portalb.mk.
eMagazine shqyrtoi se çfarë pasurie deklaroi Mexhiti në Komisionin Kundër Korrupsionit kur u bë kryetar i Komunës së Çairit për herë të katërt.
Sipas të dhënave që ai ka deklaruar në Komisionin Kundër Korrupsionit kur mori mandatin e katërt në Komunën e Çairit, Mexhiti nuk ka pasuri të paluajtshme në emrin e tij. Ai figuron se jeton në shtëpinë e prindërve, në vlerë prej 9.200.000 denarësh, ndërsa posedon një veturë të markës Peugeot në vlerë prej 1.359.000 denarësh.
Kështu, edhe pas mbi 20 vitesh në skenën politike dhe disa mandatesh në pushtetin lokal, në deklarimin zyrtar të pasurisë së tij nuk figuron ndonjë pronë personale.
Në Maqedoninë e Veriut kjo tashmë duket se është bërë praktikë e njohur, zyrtarë që në formularët e Antikorrupsionit shpesh figurojnë pa prona personale, ndërsa pasuritë “strehohen” te prindërit apo familjarët. Edhe vetë ekspertët kanë paralajmëruar se pa digjitalizim dhe kontroll më efikas, verifikimi real i pasurisë së funksionarëve mbetet i vështirë.
Ndryshe, megjithëse softueri për verifikimin e pasurive të zyrtarëve është vënë në funksion, ai ende nuk operon plotësisht për shkak të mungesës së integrimit me të gjitha institucionet që posedojnë të dhëna kyçe.
Aktualisht, sistemi i Komisioni Shtetëror për Parandalimin e Korrupsionit është i lidhur vetëm me disa institucione si MPB-ja, DAP-i, Regjistri Qendror dhe Kadastra, ndërsa procesi i integrimit me institucionet e tjera vazhdon pa një afat konkret për përfundim. Kjo nënkupton se verifikimi i pasurisë së funksionarëve mbetet ende i pjesshëm dhe në shumë raste kërkon kontrolle manuale.
Në mungesë të një sistemi tërësisht të automatizuar dhe të një ligji funksional për prejardhjen e pasurisë, institucionet vazhdojnë të kenë vështirësi në evidentimin e plotë të pronës së zyrtarëve, sidomos në rastet kur pasuria nuk figuron drejtpërdrejt në emrin e tyre.