Ansambli “Bajram Shabani” nga Kumanova organizoi festivalin “Balkan Fest”
Më datë 20 dhe 21 tetor u mbajt edicioni i III i Festivalit “Ballkan Fest” që organizohet nga Ansambli i këngëve dhe valleve “Bajram Shabani” në Kumanovë. Festivali për dy ditë solli këngë e valle shqipe nga të gjitha trojet shqiptare, ansamble e shoqëri të ndryshme nga brenda e jashtë vendit argëtuan publikun dhe po ashtu garuan për çmime, njofton Portalb.mk.
Ky festival është ndër ngjarjet më të rëndësishme kulturore për ruajtjen dhe promovimin mbarëkombëtar të trashëgimisë jo materiale. Qëllimi i këtij festivali është të përcjellë vlerat më të bukura e të larmishme të trashëgimisë shpirtërore, etnomuzikore, etnografike, si dhe prezantim me kostumet e mrekullueshme popullore nga të gjitha zonat e trevat e ballkanik. Përveç programeve të larmishme dhe pjesëmarrësve të shumtë që interpretuan repertorët e tyre, në natën e dytë si mysafir special ishte “Ansambli Shtetëror Shqiptar i Këngëve dhe Valleve në RMV”.
Drejtori i AKV” Bajram Shabani” Ilir Latifi lidhur me fillet e këtij festivali, për Portalb.mk tha se: “Ideja për një festival të tillë ka qenë e kahershme, duke u nisur nga fakti që kjo shoqëri ka marrë pjesë në shumë festivale kombëtare e ndërkombëtare dhe ka prezantuar vlerat artistike të këtyre trevave.” Ai po ashtu theksoi se ky festival u realizua falë sponsorëve të shumtë, pasi sipas tij : “Mbështetja institucionale nga Ministria e Kulturës dhe e Komunës se Kumanovës është modeste përkundër nevojave financiare që i kërkon një festival i përmasave të tilla ndërkombëtare. Duke i falënderuar sponsorët privat ky festival ka tre vite që arrin të përmbush misionin e vet, duke sjellë për publikun kumanovar dhe me gjerë, ansamble dhe shoqëri nga gjitha vendet e Ballkanit e me gjerë.
Festivale të tilla, kohëve të fundit janë rikthyer në vëmendje të publikut, pasi tradita dhe trashëgimia kulturore janë fusha të cilat nuk e humbasin kurrë interesin.
“Qëllimi i këtij festivali është që të ruaj karakterin ndërkombëtar kompetitiv duke ofruar vlera të kulturave heterogjene nga vende të ndryshme me fokus të veçantë vlerat e krahinave të ndryshme shqiptare” theksoi drejtori Ilir Latifi.
Ansambli i Këngëve dhe Valleve” Bajram Shabani” është formuar në vitin 1945 si shoqëri kulturo- artistike me të njëjtin emër. Dhe ende funksionojnë te gjitha sektorët e kësaj shoqërie, edhe atë: orkestra që numëron nëntë anëtarë, këngëtarët me emra të njohur ne muzikën popullore, pastaj edhe ansambli folklorik që përbehet nga pesë instrumentistë dhe rapsodë të trevave të Kumanovës. Sesioni I valleve është i ndarë në tre grupe ku përfshihen: grupi i veteranëve të valleve tradicionale, grupi i valltarëve nga 13 deri në 18 vjeç, që tërësisht numërojnë 50 valltarë.
Meqë festivali kishte karakter garues, gjithsej janë ndarë 13 çmime, bazuar në kriteret standarde të ndarjes së çmimeve në festivalet e zakonshme me karakter garues ndërkombëtar. Ndër më të rëndësishmet ishin tre vendet:
Vendi i parë: SHKA “Emin Duraku”- Shkup
Vendi i dytë SHKA “Malësori”- Gjonaj- Prizren
Vendi i tretë: SHKA “Presheva”- Preshevë
Orkestra më e mirë u zgjodh ajo e SHKA ” Xheladin Zeqiri”.