4.730 palestinezë të arrestuar nga forcat izraelite në Bregun Perëndimor dhe Kudsin Lindor nga 7 tetori

Numri i palestinezëve të arrestuar nga forcat izraelite në Bregun Perëndimor të pushtuar dhe Kudsin Lindor që nga 7 tetori arriti në 4.730 me arrestimin e 35 personave të tjerë, transmeton Anadolu.

Në një deklaratë të përbashkët me shkrim nga Shoqata e të Burgosurve Palestinezë dhe Komiteti për Çështjet e të Burgosurve Palestinezë i lidhur me Organizatën për Çlirimin e Palestinës, thuhet se forcat izraelite arrestuan 35 persona të tjerë në bastisjet mëngjesin e sotëm në Tulkarm, Nablus, Ramallah, Betlehem, Khalil dhe Kudsin Lindor.

Në deklaratë theksohet se numri i palestinezëve të arrestuar në Bregun Perëndimor të pushtuar dhe Kudsin Lindor që nga 7 tetori është rritur në 4.730 dhe se forcat izraelite rrahën njerëz dhe arrestuan të afërmit e tyre.

Në deklaratë thuhet se janë shkatërruar edhe shtëpitë e personave të kërcënuar.

Sipas Shoqatës së të Burgosurve Palestinezë, të dhënat për paraburgimet përfshijnë personat e liruar nga forcat izraelite pas ndalimit të tyre, ndërsa po ashtu thuhet se numri i të burgosurve palestinezë në burgjet izraelite u rrit në 7.800 deri në fund të nëntorit.

Që nga 7 tetori, kur forcat izraelite nisën një sulm në Gaza, ka pasur një rritje të ndalimeve, bastisjeve dhe sulmeve kundër palestinezëve në Bregun Perëndimor dhe Kudsin Lindor të pushtuar.