Zelenski do të vizitojë SHBA-në, Trump flet me udhëheqësit evropianë pas samitit të Putinit
Volodymyr Zelenski tha se do të vizitojë Uashingtonin të hënën për të takuar Donald Trump, i cili foli gjatë me presidentin ukrainas dhe me udhëheqësit e NATO-s dhe evropianë pas samitit të presidentit amerikan në Alaska me homologun rus Vladimir Putin, shkruan Reuters, transmeton Portalb.mk.
Samiti shumë i pritur Trump-Putin nuk dha asnjë marrëveshje për të zgjidhur ose ndaluar luftën e Rusisë në Ukrainë, megjithëse të dy udhëheqësit i përshkruan bisedimet si produktive para se të ktheheshin në shtëpi.
“Trump zhvilloi telefonata me Zelenski dhe aleatët e SHBA-së gjatë rrugës së kthimit për në Uashington, ku zbarkoi në orët e para të mëngjesit të së shtunës” njoftuan nga Shtëpia e Bardhë. Zelenski e përshkroi telefonatën mbi 90-minutëshe me Trump si “të gjatë dhe thelbësore”.
Zelenski tha se Ukraina mbështeti propozimin e Trump për një takim trepalësh midis Ukrainës, SHBA-së dhe Rusisë. Ai tha gjithashtu se diskutoi me Trump “sinjalet pozitive nga pala amerikane në lidhje me pjesëmarrjen në garantimin e sigurisë së Ukrainës”.
“Ukraina thekson se çështjet kryesore mund të diskutohen në nivelin e udhëheqësve, dhe një format trepalësh është i përshtatshëm për këtë. Të hënën, unë do të takohem me presidentin Trump në Uashington, D.C., për të diskutuar të gjitha detajet në lidhje me përfundimin e vrasjeve dhe luftës”, tha Zelenski në X.
Reporteri i Axios, Barak Ravid, tha, duke cituar një burim, se Trump i tha Zelenskit dhe udhëheqësve evropianë gjatë telefonatës se Putin nuk ishte i interesuar për një armëpushim, por për një marrëveshje gjithëpërfshirëse për t’i dhënë fund luftës.
“Mendoj se një marrëveshje e shpejtë paqeje është më e mirë se një armëpushim”, tha Trump në telefonatë, sipas Ravid, i cili citoi një burim pa e identifikuar atë person.
Reuters nuk mundi ta verifikonte menjëherë raportin.
Presidentja e Komisionit Evropian Ursula von der Leyen, Sekretari i Përgjithshëm i NATO-s Mark Rutte, Presidenti francez Emmanuel Macron dhe udhëheqës nga Gjermania, Finlanda, Polonia, Italia dhe Britania iu bashkuan telefonatës në të cilën Trump informoi aleatët rreth samitit me Putinin.