Vijojnë akuzat e VMRO-së ndaj ish-ministres së Kulturës: Bleu bileta për Dubai afër 3 mijë euro dhe nuk shkoi

By F. Xh. On 31/08/2024 12:42

Kanë vazhduar edhe sot akuzat për keqpërdorime financiare të VMRO-DPMNE-së ndaj ish ministres së Kulturës Bisera Kostandinovska Stojçeska. Deputeti i VMRO-së Mile Lefkov sot njoftoi se ish-ministrja ka shpenzuar afër tre mijë euro për bileta avioni për në Dubai, ku më pas nuk ka shkuar dhe nuk i ka anuluar të njëjtat, raporton Portalb.mk.

Lefkov tha se më 05.02.2022, ish-ministrja me para publike bleu 3 bileta avioni për Dubai në vlerë prej 173.499 mijë denarë dhe kur ajo duhej të shkonte në një udhëtim, ajo nuk e bëri.

“Ajo nuk i anuloi kartat deri në momentin e fundit dhe paratë u zhdukën. Më pas ajo ka sjellë fatura të tilla në Ministrinë e Kulturës për të justifikuar shpenzimet si përfaqësime dhe shpenzime udhëtimi. Është gjithashtu e paqartë se çfarë duhej të bënte saktësisht Bisera Antoneta në Dubai? Dhe cilat janë pasojat e mospjesëmarrjes? Apo është fjala për një dëshirë për shëtitje private në kurriz të shtetit? 3000 euro janë para me të cilat qytetarët jetojnë pothuajse gjatë gjithë vitit dhe Antoneta i ka shpenzuar si 5 denarë”, tha Lefkov.

Ai tha se nesër do të nxjerrin detaje të reja dhe udhëtime të reja të paguara, më pas të pa realizuara dhe të anuluara pa shpjegim.

VMRO-DPMNE disa herë ka akuzuar ish-ministren për keqpërdorime financiare nëpër udhëtime, fillimisht për në Britani të Madhe dhe më pas në Austri.

Ndaj këtyre akuzave ka reaguar ish-ministrja e Kulturës dhe deputetja aktuale e LSDM-së Bisera Kostadinovska Stojçeska, ajo i ka mohuar akuzat dhe ka thënë se nuk ka bërë keqpërdorime. Ajo madje ka paralajmëruar edhe padi ndaj VMRO-DPMNE-së.

Edhe ministri i Kulturës dhe Turizmit Zoran Ljutkov akuzoi paraardhësen e tij në detyrë, Bisera Kostadinovska-Stojçevska, për keqpërdorime, jo vetëm në sferën e shpenzimit të parasë publike dhe kartelës zyrtare, por edhe për operim të kundërligjshëm dhe në sferën e investimeve kapitale.

Komisioni Shtetëror për Parandalimin e Korrupsionit (KSHPK) ka hapur lëndë për të vërtetuar akuzat për keqpërdorim të mjeteve buxhetore nga ish-ministrja e Kulturës Bisera Kostadinovska-Stojçevska.