U shpërnda Abetarja e unifikuar në disa shkolla të RMV-së
Në disa shkolla fillore të Maqedonisë së Veriut sot u shpërnda abetarja e unifikuar, raporton Portalb.mk.
Abetaret të cilët janë donacion nga Instituti për Trashëgiminë Shpirtërore e Kulturore të Shqiptarëve u dorëzuan në shkollën fillore “Liria” në Shkup.
“Nga sot, nxënësit shqiptarë në Maqedoninë e Veriut do të mësojnë shkronjat e arta të alfabetit shqip njësoj si bashkëmoshatarët e tyre në Shqipëri dhe Kosovë. Është padyshim një hap thelbësor në mirëmbajtjen e identitetit tonë kombëtar në një epokë të globalizimit”, tha Izet Mexhiti, zëvendës-kryeministër.
Abetarja u dorëzua edhe në Tetovë
“Kjo është abetarja e parë e unifikuar mbarëkombëtare. Prej këtë vit do të shërbehen edhe nxënësit e shkollave shqipe”, tha Bilall Kasami, kryetar i Komunës së Tetovës.
Lidhur me këtë ka reaguar ish-ministri i Arsimit, Jeton Shaqiri, i cili thotë se Bilalli, Izeti e nëpërgjithësi VLEN-i po i përvetësojnë vlerat e tjetërkujt.
“Bilall, Izet, dhe ju tjerët në Vlen,
Nuk jeni shembull i mirë për këtë fillimvit shkollor, sepse nxënësit dhe të rinjtë ndër breza i kemi edukuar dhe këshilluar se duhet ta themi gjithmonë të vërtetën dhe vlerat e tjetërkujt nuk duhet ti përvetësojmë sepse e vërteta gjithmonë del në shesh. Zv Ministër Lulzim shpresoj që ti sot se ke pas për PR ditor.Drejtor Skender edhe ju e dini të vërtetën cilët Abetare po shpërndani, mos u bregosni për pozicionin ndoshta e keni afatgjatë.
Ja e vërteta për Abetaren e unifikuar të cilën e kemi siguruar ne dhe po e shpërndani ju pa e thënë se ku dhe nga kush e keni marrë”, shkruan Shaqiri.
Edhe pse kanë kaluar nëntë vjet nga marrëveshja e arritur në sferën e arsimit ndërmjet RMV-së dhe Shqipërisë dhe dymbëdhjetë vjet nga përdorimi i Abetares së unifikuar shqiptare në Kosovë, nxënësit shqiptarë të Maqedonisë së Veriut ende nuk e kanë të gjithë në duar Abetaren e unifikuar.
Përdorimi i Abetares së unifikuar nga nxënësit shqiptarë të Maqedonisë së Veriut paraprihej me ndryshim të ligjit të teksteve shkollore.
Në nëntor të vitit 2023, Ministria e Arsimit dhe Shkencës bëri të ditur se abetarja e unifikuar do të përdoret edhe në Maqedoninë e Veriut, por vetëm pasi të jenë modifikuar programet mësimore për nxënësit e klasave të para me mësim në gjuhën shqipe, pasi vendimi për Abetaren që tashmë përdoret në Shqipëri dhe Kosovë, ka marrë miratimin e institucioneve përkatëse, Byrosë për Zhvillimin e Arsimit dhe Entit Pedagogjik.
Abetarja e unifikuar shpesh është përdorur për pikë politike nga politikanët në RMV.
Kujtojmë që, nxënësit e klasës së parë në Shqipëri dhe Kosovë mësojnë me këtë Abetare të unifikuar.