Trump: E telefonova Putinin dhe po përgatis takim me Zelenskyn
Presidenti i SHBA-së, Donald Trump, tha se ka folur në telefon me presidentin rus Vladimir Putin dhe se ka filluar të organizonte takim midis tij dhe presidentit ukrainas Volodymyr Zelensky, transmeton Portalb.mk.
“E telefonova presidentin Putin dhe fillova të bëja përgatitjet për takim, në një vend që do të përcaktohet më vonë, midis presidentit Putin dhe presidentit Zelensky”, tha Trump në një postim në llogarinë e tij në Twitter pas takimit të tij me Zelenskyn dhe udhëheqësit evropianë në Shtëpinë e Bardhë të martën.
“Pas atij takimi, do të kemi një takim trepalësh, ku do të jenë të dy presidentët, plus unë”, tha Trump, duke e quajtur atë “një hap shumë të mirë dhe të hershëm në një luftë që ka vazhduar për gati katër vjet”.
Trump tha se zëvendëspresidenti i SHBA-së J.D. Vance, sekretari i Shtetit Marco Rubio dhe i dërguari i posaçëm Steve Witkoff po “koordinoheshin me Rusinë dhe Ukrainën”.
Edhe pse Kremlini nuk e ka njoftuar publikisht marrëveshjen e tij, një zyrtar i lartë i administratës amerikane tha se takimi Putin-Zelensky mund të zhvillohet në Hungari.
Pas njoftimit të Trumpit, kancelari gjerman Friedrich Merz tha të mërkurën se Putin dhe Zelensky pritet të takohen në dy javët e ardhshme.
Merz tha se vendi i takimit dypalësh nuk ishte rënë dakord ende dhe theksoi se do të duhej të përgatitej plotësisht.
“Sipas mendimit tim, do të ishte e dëshirueshme – dhe më shumë se kaq – nëse ky takim do të çonte më në fund në një armëpushim në Ukrainë”, tha kancelari.
Merz theksoi se Ukraina nuk duhet të detyrohet të lëshojë asnjë territor. Kancelari paralajmëroi se kërkesa e Rusisë që Ukraina të heqë dorë nga pjesët e pushtuara të Donbasit do të ishte e krahasueshme me “që Shtetet e Bashkuara të duhet të heqin dorë nga Florida”. Një shtet sovran nuk mund të vendosë thjesht diçka të tillë, tha ai.
Kancelari tha se partnerët evropianë e kishin mirëpritur fuqimisht njoftimin e Trump se ai do t’i ofronte Ukrainës garanci sigurie. Këto garanci, shtoi ai, ishin rezultat i diskutimeve të gjata dhe intensive.
“Në rast të një marrëveshjeje paqeje, do të ketë garanci të përshtatshme sigurie për Ukrainën”, tha Merz.
Trump dhe Zelensky folën privatisht në Shtëpinë e Bardhë dje përpara se t’i bashkoheshin një kontingjenti udhëheqësish evropianë, përfshirë krerët e Britanisë, Gjermanisë, Francës, Italisë, Finlandës, Bashkimit Evropian dhe NATO-s, për më shumë se dy orë bisedime shumëpalëshe.