“TEUTA” mbrëmë festoi 20-vjetorin e themelimit të Korit të Grave (VIDEO)
Mbrëmë në Qendrën e Kulturës në Tetovë, u mbajt edicioni i 14-të i Festivalit “TEUTA”, një ngjarje që ndër vite ka ruajtur dhe promovuar magjinë e këngës së vjetër qytetare. Ky edicion ka një rëndësi të veçantë, pasi përkon me 20-vjetorin e themelimit të Kori të Grave “TEUTA”, i cili ka ruajtur me pasion dhe përkushtim traditën muzikore qytetare, shkruan Portalb.mk.
Jeton Pustina udhëheqës i grupit të grave “TEUTA” për Portalb.mk tha se veçantia e këtij edicioni është se, për herë të parë, u përurua kënga-himn e grupit të grave “Teuta”.
“Festivali i këngës qytetare, ashtu si edhe grupi i grave “TEUTA”, tashmë janë etabluar si brende kulturore të qytetit të Tetovës. Organizimi i një festivali të këtyre përmasave, me artistë dhe grupe ndër më eminentët, është një punë e madhe dhe një përpjekje e jashtëzakonshme për ta mbajtur gjallë frymën qytetare e intelektuale të qytetit tonë në këto kohëra të turbullta. Unë mendoj se veçantia e këtij edicioni është se, për herë të parë, u përurua kënga-himn e grupit të grave “Teuta”, si edhe videospoti, i cili është realizuar në lokacione të ndryshme të Tetovës. Besoj se kjo është një befasi shumë e bukur për gjithë publikun”, tha Pustina.
Ai shtoi se festivali ka pasur rritje në të gjitha aspektet.
“Festivali, gjatë këtyre viteve, ka pasur rritje si në aspektin organizativ, ashtu edhe në atë artistik. E marr të drejtën të flas, pasi për 12 vite kam qenë udhëheqës artistik dhe, së bashku me grupin e grave “TEUTA”, edhe themelues i këtij festivali. Gjatë këtyre viteve, në skenën e festivalit kanë performuar grupe, kore dhe solistë nga pothuajse të gjitha qytetet e hapësirave mbarë-shqiptare. Përveç vitit të kaluar, kur festivali dështoi për shkak të një udhëheqësi joprofesionistë, këtë vit, sipas informacioneve që kam dhe duke parë angazhimin e drejtoreshës së re, besoj se do të rikthehet në nivelin e duhur, ashtu siç e meriton një aktivitet i tillë. Unë vazhdoj të jap kontribut në këtë festival, por tash vetëm si udhëheqës i grupit të grave “Teuta””, tha Pustina.
Në këtë festival, ansamble të njohura nga të gjitha trojet shqipfolëse e nderuan skenën me performancat e tyre:
- Kori i Grave “Teuta”
- Kllapa Ulqinake “Burimi”-Ulqin
- SHKA “Presheva”-Preshevë
- Kori “Nexhmije Pagarusha”-Prishtinë
- Okteti “Ilirikum”-Tetovë
- Ansambli “Isuf Myzyiri”-Elbasan
- Grupi “Rilindja”-Gjakovë
Duhet të theksohet se tani grupi i grave “TEUTA” funksionon në kuadër të SHKA “Xheladin Zeqiri”, ku kryesia e saj kujdeset për çdo detaj, dhe sidomos për orkestrën, e cila në çdo kohë ka qenë dorë e zgjatur dhe mbështetje për këtë grup.
