Sonte në Gostivar hapet ekspozita“Forca dhe Liria e Krijimit” e piktorit Dashmir Bajrami
Sot (13 dhjetor) me fillim nga ora 19:00 në Qendrën për Kulturë në Gostivar hapet ekspozita personale “Forca dhe Liria e Krijimit” e piktorit Dashmir Bajrami. Në këtë ekspozitë do të prezantohen 30 piktura të punuara në teknika të ndryshme, transmeton Portalb.mk.
Këto vepra në këtë ekspozitë shprehin një energji të jashtëzakonshme, duke ofruar një balancë vizuale të fuqishme që angazhon shikuesin dhe e fton atë të eksplorojë më tej ndjeshmërinë dhe forcën që janë pasqyra e artit të tij.
Ndërlikimi vizual dhe fuqia emocionale që ai ka arritur janë pasqyrime të lirisë krijuese, duke ofruar një shembulltë ekspresionizmit bashkëkohor.
Kuratori i ekspozitës Bashkim Mexhiti për Portalb.mk tha se pikturat e Dashmir Bajramit janë një shprehje e fuqishme dhe dinamike e emocioneve që lindin natyrshëm nga procesi krijues.
“Nëpërmjet frymës së abstraksionit ekspresionist, ai krijon vepra që janë jo vetëm vizualisht magjepsëse, por gjithashtu provokuese dhe të ngarkuara me emocion. Çdo pikturë është një udhëtim transcendental përmes një kompozimi të ndërlikuar ngjyrash, vijash dhe teksturash që kalojnë nga kaosi në harmoni, duke krijuar një ndjenjë të fortë tensioni dhe lirie”, tha Mexhiti.
Mexhiti më tej shtoi se veprat e Dashmirit janë një eksplorim i kontrastit mes ngjyrave të ngrohta dhe të ftohta.
“Një nga aspektet më të dukshme të veprave të tij është eksplorimi i kontrastit mes ngjyrave të ngrohta dhe të ftohta, një teknikë që thekson thellësinë e ndjenjave emocionale. Përzierja e ngjyrave të ngrohta dhe të zbutura krijon një shpërthim energjie që duket sikur shpërthen nga pelhura, duke ftuar shikuesin të hyjë në një botë të pasur me kuptime dhe lëvizje. Forma dhe vijat e lira janë të ndërlidhura në mënyrë harmonike, duke krijuar një rrëfim vizual që ofron hapësirë për interpretim të lirë. Në disa raste, elemente si njolla e zezë funksionojnë si pika tërheqëse që theksojnë tensionin që lind nga përplasja e ngjyrave dhe formave, duke i dhënë veprës një sens të thellë dhe ekspresiv”, tha Mexhiti.
Një tjetër element i rëndësishëm në veprat e tij është tekstura, e cila kontribuon ndjeshëm në jetësimin e çdo vepre. Menaxhimi i mjeteve profesionale gjatë procesit krijues është thelbësor për formimin e teksturës, duke krijuar shtresa të trasha ngjyrash që shtojnë një dimension tredimensional në pikturë.
Ky projekt u mbështet nga Ministria e Kulturës së RMV-së, Shoqata e Artistëve Figurativ të Maqedonisë dhe Qendra për Kulturë Gostivar.
