QMK e mbajti takimin e parë koordinues për gjetjen e zgjidhjes me shfaqjen e gjarpërinjve
Dje në Qendrën për Menaxhimin e Krizave (QMK), drejtori Stojançe Angelov mbajti Takim Koordinues me temë “Kërcënimi për jetën dhe shëndetin e njerëzve nga prania e shtuar e gjarpërinjve në zonat urbane”, ku morën pjesë përfaqësues nga Ministria e Punëve të Brendshme dhe Kopshti Zoologjik Shkup, dhe përfaqësues të lartë nga Qendra për menaxhim me kriza, transmeton Portalb.mk.
Ndryshe, në seancë nuk kanë marrë pjesë përfaqësuesit e Ministrisë së Mjedisit dhe Planifikimit Hapësinor, Ministrisë së Shëndetësisë dhe Ministrisë së Bujqësisë, Pylltarisë dhe Ujërave, edhe pse të ftuar.
Drejtori i QMK-së Angelov në fillim e theksoi rritjen e numrit të raportimeve të gjarpërinjve në vend, si gjendje faktike, që tregon për një reagim të duhur parandalues nga strukturat shtetërore që janë në kontakt me atë temë.
Përfaqësuesit nga Kopshti Zoologjik i Shkupit informuan se vullnetarisht, në kufijtë e mundësive të tyre, ndonjëherë ndihmojnë në largimin e sigurt të gjarpërinjve dhe këtë e bëjnë për të mirën e qytetarëve, ndërsa theksuan se do të ishte e dobishme të ftoheshin përfaqësues nga sektori joqeveritar në takimin e ardhshëm koordinues, posaçërisht nga Shoqëria Ekologjike Maqedonase (ShEM), (“herpatologët”), për të ofruar ekspertizë profesionale.
Ata po ashtu theksuan se në qytetin e Shkupit për momentin nuk ka raste të personave të lënduar apo të vdekur rrezikshëm nga gjarpërinjtë helmues, që është në domenin e Ministrisë së Shëndetësisë dhe Institutit të Shëndetit Publik.
Në takimin konstruktiv u diskutua edhe për gjërat që kanë të bëjnë, si në vendet e tjera moderne, me licencat apo lejet për kapjen kafshëve të egra, mënyrën e kapjes së kafshës së egër, mënyrën dhe vendet ku ajo më pas lëshohet e gjallë dhe në liri të sigurt në natyrë ose në vend tjetër të caktuar, sipas rasteve specifike.
Këto ishin çështje që janë në sferën e problemeve të Ministrisë së Bujqësisë, dhe Ministrisë së Mjedisit dhe Planifikimit Hapësinor, të cilat sipas informacioneve duhet të ndajnë mjete financiare në buxhet për trajnime, për veprime në terren dhe kurse edukimi për trajtimin dhe takimin me kafshët e egra.
Ndryshe, në takimin Koordinues u theksua se është e dëshirueshme që kjo temë të ndahet përmes bashkëpunimit me media, sepse janë mediat ato që në shumë mënyra tregojnë përgjegjësinë e tyre të madhe sociale në sferën e ngritjes së vetëdijes sociale dhe sigurisë së qytetarëve dhe edukativisht të veprojë në një bazë më të gjerë në shoqëri.
Disa ditë më parë, Qendra për Menaxhimin e Krizave (QMK) bëri thirrje për kujdes gjatë ecjes në natyrë për shkak të pranisë së gjarpërinjve. Nga atje ata thonë se gjarpërinjtë zakonisht ikin nga njerëzit, por nëse ata shqetësohen ose shkelin aksidentalisht ose futen në kurth atëherë ata mund të sulmojnë dhe pickojnë.
Në një rast të tillë, shton QMK-ja, pas vetëndihmës së parë të treguar, është e dobishme që qytetarët të telefonojnë në numrin e vetëm të telefonit të urgjencës 112, nga ku do të lidhen me shërbimin e urgjencës mjekësore dhe do të marrin këshilla për trajtimin e mëtejshëm.
Është veçanërisht e rëndësishme, thonë nga QMK, që qytetarët të marrin trajtim sa më të shpejtë mjekësor nëse pickohen nga gjarpri helmues.
“Nuk ka institucione të specializuara për largimin e tyre, por ka individë, por edhe shoqata civile për mbrojtjen e kafshëve, të cilat mund t’i ndihmojnë qytetarët që të largojnë në mënyrë të sigurt gjarpërinjtë dhe zvarranikët e tjerë nga ndërtesat dhe sipërfaqet”, tha QMK.
Në qershor, gjarpërinjtë u panë në disa vendbanime.
QMK, në numrin e vetëm të thirrjes emergjente – 112, ka pranuar raporte për gjarpërinj të regjistruar në Shkup dhe Prilep në periudhën e kaluar.