Për Durmishin shporta e vjeshtës dha rezultat, edhe pse për harxhimet bazë qytetarët “kursyen” vetëm 57 denarë
Ministri i Ekonomisë dhe Punës Besar Durmishi sot në konferencë për media në Ministrinë e Ekonomisë dhe Punës prezantoi rezultatet e shportës konsumatore të vjeshtës. Sipas tij, masa u zbatua me sukses dhe sipas analizave të Ministrisë së Ekonomisë i dha rezultatet e pritshme. Por, përkundër masës, qytetarët në muajin tetor kanë arritur të “kursejnë” vetëm 57 denarë nga harxhimet e nevojshme bazë për dallim nga muaji paraprak, transmeton Portalb.mk.
Sipas të dhënave të Lidhjes së Sindikatave të Maqedonisë (LSM), vlera e shportës minimale sindikale për muajin tetor është 57 denarë më pak se në shtator, kur ishte 61.306 denarë.
“E miratuam këtë masë për të mbrojtur qytetarët në një kohë kur ka rritje të çmimeve të produkteve themelore ushqimore , kryesisht gjatë festave, respektivisht për të stabilizuar çmimet dhe për të parandaluar rritjen e tyre të menjëhershme”, tha Durmishi.
Analizat e tyre, thotë Durmishi, tregojnë se çmimet e produkteve nga shporta konsumatore e vjeshtës janë ulur mesatarisht nga 5% deri në 10%, me ç‘rast te disa produkte ulja e çmimeve është e vogël, ose nuk ka ulje fare, derisa te produktet tjera e njëjta është dukshëm më e lartë.
“Sigurisht, siç e dini, kemi pasur vërejtje për këtë masë nga pjesa më e madhe e tregtarëve dhe disa nga shpërndarësit, por gjithsesi i dha rezultatet që i prisnim, meqë mbrojtja e standardit jetësor është prioriteti ynë. Të dhënat tona tregojnë se të shprehur në aspektin e kursimeve në para për një familje katëranëtarëshe, në nivel mujor kursimet nga marzhet e kufizuara dhe çmimet e ulura të disa prej produkteve është në 1.360 denarë për familje, në varësi të mënyrës së ushqyerit, si dhe zgjedhjes së tregjeve ku blihet ushqimi. Kjo konfirmohet nga të dhënat e Sindikatave nga shporta e tyre sindikale, ku në tetor në pjesën e ushqimit dhe pijeve është ulur për 935 denarë. Kjo tregon se masat e qeverisë, të cilat janë aktualisht në fuqi, kanë dhënë rezultate dhe çmimi i ushqimeve për një muaj është ulur”, tha Durmishi.
Sipas tij, ulja e përgjithshme e shportës sindikale të tetorit është 57 denarë, por këtu e përfshin edhe qiranë. Megjithatë, LSM-ja tha se nëse e njëjta familje jeton në banesë me qira, atëherë në tetor u nevojiten edhe 15.375 denarë shtesë, me çka shporta rritet në 76.624 denarë.
“Në periudhën e ardhshme, siç paralajmëruam, do të ketë shportë të Krishtlindjes, të Ramazanit, të Pashkëve. Këto shporta do të kenë përbërje të ndryshme të produkteve, në varësi të asaj se çfarë shpenzohet më shumë gjatë asaj periudhe dhe në dialog me prodhuesit dhe me tregtarët, këtë masë do ta krijojmë në mënyrë që të jetë në interesin e të gjithëve dhe të jetë lehtësisht e zbatueshme. Se çfarë modeli do të zgjedhim do të varet nga propozimet që do t’i marrim, e sigurisht duhet të merret parasysh se në marketet gjatë festave ka ulje dhe aksione të produkteve të caktuara, kështu që do të shohim se si do të mund të përfshihen në shportat e ardhshme. Ajo që është me rëndësi të them është se kjo masë, respektivisht shporta nuk do të zgjasë më shumë se një muaj”, tha Durmishi.
Ndryshe, nga sot, masa e marzheve të ngrira nuk është në fuqi dhe autoritet presin që të mos ketë rritje të çmimeve nga tregtarët. Nëse kjo ndodh, respektivisht, nëse vjen deri te rritja e pakontrolluar e çmimeve pa asnjë bazë, atëherë Ministria e Ekonomisë dhe Punës do të ndërmarrë të gjitha masat që i ka në dispozicion dhe do të marrin vendime më rigoroze për të mbrojtur standardin jetësor të qytetarëve.