Fatmir Limani iu përgjigj pyetjes së VLEN-it, çfarë kërkonte në një tavolinë me Ali Ahmetin për iftar?
Ministri i Politikës Sociale, Demografisë dhe Rinisë, Fatmir Limani, i cili ka mosmarrëveshje me disa nga anëtarët e tjerë të koalicionit qeverisës VLEN, por që zyrtarisht është ende pjesë e tij, iu përgjigj pyetjes që i bëri koalicioni nëpërmjet një postimi në rrjetet sociale – çfarë po bënte në të njëjtën tavolinë me kundërshtarët politikë Ali Ahmeti dhe Arben Taravari në darkën e iftarit të organizuar nga kryeministri i Shqipërisë Edi Rama?, raporton Portalb.mk.
“Nëse dikush kërkon shpjegim pse Fatmir Limani është në një tryezë ku shfaqet edhe Ali Ahmeti, përgjigjja është më e thjeshtë sesa përpjekja për ta shndërruar atë në një “dilemë politike”, tha Limani në postim.
“Së dyti, fotografia apo prania në një ambient të përbashkët nuk e rishkruan historinë e qëndrimeve politike të askujt. Qëndrimet e mia kanë qenë gjithmonë publike dhe të qarta. Por kultura politike dhe pjekuria shoqërore avancon dhe kërkon që edhe kundërshtarët të jenë në gjendje të përshëndeten, të bisedojnë dhe të ruajnë një minimum normaliteti në raportet njerëzore”, shton më tej ai.
Limani thekson se ndërkohë që disa përpiqen të krijojnë “dilema artificiale nga një fotografi iftari”, ai ndodhet përballë një realiteti tjetër: një përpjekje të hapur dhe përjashtuese ndaj meje, “pikërisht nga ata me të cilët ndërtuam bashkë një projekt politik”.
“Nuk është sekret që brenda VLEN-it, zhvillohet një luftë me bërryla për të zëvendësuar me figura anonime, protagonistët kryesorë që realizuan projektin e bashkimit. Në rrethana të tilla, askush nuk mund të presë që unë të qëndroj duarkryq. Sepse unë jam njeri i tavolinave jo i bodrumeve. Duhet thënë edhe një gjë thelbësore:
– sofrat që bashkojnë nuk duhet të shqetësojnë askënd, përveç atyre që nuk i’a duan të mirën kombit.
Tradita e iftarit gjithmonë ka luajtur rolin e urës që afron njerëzit, pavarësisht bindjeve apo përkatësive të tyre.
Në një kohë kur shoqëria ka nevojë për më shumë ura lidhëse dhe më pak mure ndarëse, çdo përpjekje për ta problematizuar një moment të tillë flet më shumë për frikën e disa njerëzve nga dialogu sesa për realitetin politik.
Politika është garë idesh dhe vizionesh, por kultura jonë mbetet më e madhe se çdo rivalitet i përkohshëm. Dhe pikërisht këtë simbolizon një sofër iftari: respektin për tjetrin dhe mundësinë që, edhe në dallime, të ruajmë dinjitetin e përbashkët. Ata që me mendojne ndryshe nisen nga veperime qe i bejne secilën ditë”, thekson Limani.
Paraprakisht, Bilall Kasami tha për Alsat se Fatmir Limani nuk ka qenë i deleguar i VLEN-it në iftarin e Edi Ramës në Tiranë, ndërsa për fotografinë me Ali Ahmetin i kërkon të sqarohet publikisht.
“Sigurisht që mbetet vet zotëri Limani këto ditë të sqarojë qëllimin dhe atë se pse është ulur në një tavolinë me Ali Ahmetin, të cilin ai vetë ka deklaruar se me asnjë farë kushti nuk do të ishte ulur bashkë me ata të cilët i ka akuzuar si vrasës të babait të tij”, tha Kasami.
Kasami paralajmëron hapjen e diskutimit në VLEN për shkarkimin e Limanit.
“Derisa nuk ka një vendim ndryshe, sigurisht se është, por të gjitha këto zhvillime sigurisht që ndikojnë edhe për sqarimin e kësaj situate… Në kuadër tanimë të VLEN-it duhet ta diskutojmë edhe pozicionimin edhe të tij dhe shumë të tjerëve”, theksoi Kasami.
Tensionet mes ministrit të Politikës Sociale, Demografisë dhe Rinisë Fatmir Limani dhe kryetarit të Lëvizjes Besa Bilall Kasami, nga radhët e së cilës parti është edhe Limani, janë shfaqur prej kohësh brenda koalicionit shqiptar VLEN, i cili është pjesë e qeverisë në Maqedoninë e Veriut. Kasami ka shprehur publikisht pakënaqësi për rolin dhe performancën e përfaqësuesve të Besës në qeveri, duke mos përjashtuar mundësinë që partia të kërkojë edhe shkarkimin e Limanit nga posti i ministrit.
Në këtë kontekst, kryeministri Hristijan Mickoski reagoi ndaj deklaratave të Kasamit, duke theksuar se është i kënaqur me punën e Limanit dhe se ai mbetet “vlerë e shtuar” në Ministrinë e Politikës Sociale. Mickoski rikujtoi gjithashtu se si mandatar i qeverisë është ai që e formon kabinetin qeveritar dhe merr vendime për përbërjen e tij.
Këto zhvillime kanë thelluar debatet brenda koalicionit VLEN dhe kanë hapur diskutime për pozicionimin e disa figurave politike në qeveri, ndërsa tensionet janë reflektuar edhe në deklarata publike dhe qëndrime të ndryshme mes partnerëve të koalicionit.