E djathta fitoi zgjedhjet e Parlamentit Evropian, e djathta ekstreme përparoi në vendet më të mëdha
Qendra evropiane e gravitetit politik po zhvendoset djathtas. Partitë e moderuara dhe të ekstremit të djathtë fituan numrin më të madh të vendeve në Parlamentin Evropian në zgjedhjet në vendet e BE-së të dielën më 9 qershor, veçanërisht në vendet më të mëdha, si Gjermania, Franca, Italia, Spanja dhe Polonia, raporton Reuters, transmeton Portalb.mk.
Më e theksuar ishte në Francë, ku Fronti Popullor i krahut të djathtë fitoi 32 për qind të votave, më shumë se dyfishi i partisë së Rilindjes së presidentit liberal Emmanuel Macron. Kjo çoi në shpërbërjen e parlamentit francez dhe zgjedhje të parakohshme më 30 qershor dhe 7 korrik.
Në Gjermani, koalicioni i moderuar i djathtë CDU-CSU fitoi me shumicë, por Alternativa për Gjermaninë e ekstremit të djathtë fitoi më shumë vota se socialdemokratët qeverisës të kancelarit Olaf Scholz.
Votuesit nga 27 shtete anëtare votuan për zgjedhjen e 720 deputetëve të Parlamentit Evropian, me një mandat 5-vjeçar.
Detyra e tyre e parë do të jetë zgjedhja e presidentit të Komisionit Evropian.
Edhe pse nuk ka gjasa të koordinohen si një grup i unifikuar në Parlamentin Evropian për shkak të ndarjeve të brendshme për shumë çështje, si për shembull Rusia, partitë e ekstremit të djathtë do të kenë një ndikim të madh në politikën e BE-së, për çështjet nga imigracioni deri te politikat klimatike.
Të marra së bashku, në teori, partitë radikale të krahut të djathtë përfaqësojnë bllokun e dytë më të madh në Parlamentin Evropian.
Në Itali, partia e kryeministrit Giorgia Meloni fitoi lehtësisht shumicën e vendeve. E djathta ekstreme fitoi gjithashtu në Hungari dhe fitoi pesë vende më shumë se kurrë në Holandë.
Në Greqi dhe Bullgari fitoi e djathta e moderuar.
Megjithatë, duket se fituesja më e madhe e zgjedhjeve është presidentja aktuale e Komisionit Evropian, Ursula von der Leyen, sepse blloku i saj, Partia Popullore Evropiane, do të jetë sërish blloku më i fuqishëm në Parlamentin Evropian.
Sipas parashikimeve fillestare, ENP do të ketë 189 mandate në parlament dhe do të jetë forca dominuese, por vështirë se do të mund të qeverisë e vetme, duke qenë se është larg shumicës.
Sfida kryesore e Von der Leyen në javët e ardhshme do të jetë nëse mund të arrijë një marrëveshje me partitë tradicionale të qendrës, si socialistët dhe liberalët, për të siguruar një shumicë prej 361 vendesh në parlament.
“Sot është një ditë e mirë për ENP. Ne kemi fituar zgjedhjet evropiane miqtë e mi. Ne jemi partia më e fortë, ne jemi spiranca e stabilitetit. Së bashku me të tjerët do të ndërtojmë një bastion kundër ekstremeve të së majtës dhe të djathtës. Ne do t’i ndalojmë!”, tha ajo.