Profesoresha Merita Abazi letërsisë i jepte ngjyra dhe kuptime të reja
Portalb.mk vazhdon të sjellë profile grash të suksesshme që kanë kontribuuar dhe kontribuojnë për një të ardhme më të mirë të përbashkët në RMVProfesoresha Metrita Abazi e cila letërsisë i jepte ngjyra dhe kuptime të reja për sa u përket të drejtave njerëzore dhe barazisë gjinore. Në mungesë të një mirënjohjeje institucionale për gratë pensioniste që kanë punuar aq shumë në fushat e tyre për të mirën e përbashkët, ne si redaksi sjellim në fokus dhe rikujtojmë aktivitetin e tyre. Kësaj radhe prezantojmë profesoreshën e gjuhës shqipe Merita Abazin.
Merita Abazi është gruaja që qesh gjithmonë, që duket sikur gjithë jetën ka jetuar pa brenga e halle. Energjia e saj pozitive e bën të denjë për të qenë një profesoreshë e gjuhës shqipe dhe një pedagog që ka ngelur në kujtesën e nxënësve që i ka pasur të shumtë. Me nderime të larta e ndalojnë rrugës, flasin për mënyrën magjike të interpretimit të letërsisë. Ca thonë se të ishe në klasën e Merita Abazit ishte si të shihje film. Letërsisë i jepte ngjyra dhe kuptime të reja.
Tashmë, Merita Abazi është në pension, por elanin për leximin dhe punën e ruan. Ajo kudo ku takon nxënës i porosit të lexojnë. “Ndoshta mund të dukem e çuditshme, se më shohin me habi kur i takoj të rinjtë në stacion dhe u them lexoni …”
Ajo është një gjyshe e lumtur që tregon përralla dhe ndoshta përralla më e bukur është vetë jeta e saj.
Merita Shefqet Abazi lindi në 6 mars 1955 në Tetovë. Shkollën fillore dhe gjimnazin e mbaroi në Tetovë, ndërsa Fakultetin e Filologjisë Dega e Gjuhës dhe e Letërsisë shqipe në Shkup. Merita u punësua në gjimnazin “Zef Lush Marku” në Shkup në vitin 1980 dhe u pensionua në mars të vitit 2020.
Merita shkruan poezi që nga shkolla e mesme, kështu që pas pensionimit, vendosi t’i botojë krijimet e saja letrare. Në fillim e hapi kanalin e saj në Youtube me titullin “Përrallat e nanës” ku i zgjodhi, i përktheu, i përgatiti dhe i tregon në vazhdimësi në gjuhën e sotme standarde përrallat më të bukura shqiptare dhe botërore, legjendat, mitet dhe tregimet. Në vitin 2022 botoi përmbledhjen e parë me poezi “Imagjinata e endacakes”. Ajo vazhdoi me aktivitetet e saja si në poezi ashtu edhe në prozë. Libri i saj i dytë “Nëpër stinët e kohës”, është një përmbledhje kujtimesh nga fëmijëria, rinia dhe pjekuria.
Libri i saj i tretë me tregime u botua më 2023. Kordele me rrëfime”, u botua në Prishtinë 2024. Ajo vazhdon me shkrime të poezive në përmbledhjen e dytë “Dashurinë ia falim pranverës”.
Merita gjithashtu, është duke përgatitur një vepër me vështrimet e saja kritike për veprat e shkrimtarëve më eminentë shqiptarë dhe botërorë.
Është aktive me shoqatat e shkrimtarëve, sidomos me Oeneumin Tetovë, ‘’shëtisim mbajnë orë letrare dhe dhurojmë libra’’, siç shprehet ajo.
Momentalisht është duke punuar në një roman.
