Dorëzimi i naftës në NTP “Shkup” është pezulluar pavarësisht faktit se ndërmarrja ka kontratë aktive me “Pucko Petrol”, thotë Qyteti i Shkupit. Në reagimin e Qytetit, ata akuzojnë se pronari i “Pucko Petrol”, Asmir Jahoski, është nën “presion të fortë politik” dhe se po bashkohet në përpjekjet për të krijuar kaos në Shkup, transmeton Portalb.mk.
“Edhe pse ekziston kontratë aktive me NTP për dërgimin e naftës, Asmir Jahoski nga ‘Pucko Petrol’, i cili përballet me akuza për burgim dhe është nënshtruar shantazhit, ka pezulluar dërgimin, pavarësisht se ka një kontratë aktive për dërgimin e naftës”, thotë Qyteti i Shkupit.
Prandaj, ata thonë se do të ngrenë përgjegjësi materiale dhe penale përkatëse që rrjedhin si rezultat i mosrespektimit të kontratës.
“Prandaj, do të iniciohen procedura përkatëse kundër Asmir Jahoskit dhe ‘Pucko Petrol’ për përgjegjësi materiale dhe penale që rrjedhin si rezultat i mosrespektimit të marrëveshjes së furnizimit me naftë, me qëllim ndalimin e funksionimit të autobusëve të NTP”, thuhet në deklaratë.
Sipas Qytetit të Shkupit, kjo nuk është hera e parë që ‘Pucko Petrol’ ka ndaluar dërgesat, gjë që ndodhi edhe para festave të Vitit të Ri.
Në deklaratë thuhet se VMRO-DPMNE, përmes Bordit të Drejtorëve në NTP “Shkup”, dhe Hristijan Mickoski së bashku me Jahoskin, duan të shpërqendrojnë publikun nga dëmi që, sipas tyre, i është shkaktuar ndërmarrjes dhe qytetit në katër vitet e fundit.
Qyteti i Shkupit thekson se VMRO-DPMNE pengoi blerjen e autobusëve të rinj dhe nuk votoi për transport publik falas.
Qyteti i Shkupit thotë se nuk do të lejojë që “veprimet idiote kriminale të biznesmenëve të shantazhuar” të dëmtojnë qytetarët.
Nëntorin e kaluar, problemi me transportin publik në Shkup u bë alarmant pasi autobusët e NTP “Shkup” ndaluan së qarkulluari për shkak të mungesës së naftës. Vetëm ato autobusë që punojnë me metan mund të shiheshin në rrugët e Shkupit.
Për të kapërcyer problemin, Qeveria, në një seancë të jashtëzakonshme, miratoi vendim me të cilin vërtetoi ekzistencën e një situate krize në furnizimin me energji termike në zonën e qytetit të Shkupit, për shkak të mungesës së energjisë termike, mundësisë së përdorimit të karburantit alternativ dhe kushteve në tregun e energjisë termike.
Me këtë vendim, Qytetit të Shkupit iu dha karburant për shtatë ditë nga rezervat shtetërore të naftës. Rezervat e naftës që Qeveria transferoi nga rezervat shtetërore ishin të mjaftueshme për shtatë ditë, dhe ndërkohë, u shpall një tender i ri për furnizimin e naftës për NTP “Shkupi” pas anulimit të tenderit të parë, për çka kryeqyteti u gjend në këtë situatë.
Në dhjetor, mediat raportuan se NTP “Shkup” kishte vendosur të zbatonte një furnizim intervenues të naftës me vlerë 120 milionë denarë pa TVSH. Furnizimi u krye nga “Pucko Petrol”, i cili ishte ofertuesi i vetëm.