Ministri i Shëndetësisë Azir Aliu sot, duke iu përgjigjur pyetjeve gazetareske në lidhje me parkingun në Qendrën Klinike, tha se diku deri në maj do të kemi parking krejtësisht të ri me infrastrukturë “smart” dhe garazh në kate, transmeton Portalb.mk.
Ai shpjegoi se kishte një problem administrativ në lidhje me infrastrukturën e parkingut në Qendrën Klinike Universitare “Nënë Tereza” në Shkup.
Ministri informoi gjithashtu se së bashku me Ministrinë e Arsimit dhe Shkencës po krijojnë strategji kombëtare për 10 vjet në mënyrë që të jenë në gjendje të krijojnë një profil të punonjësve dhe profesionistëve të kujdesit shëndetësor, aty ku është e nevojshme.
“Kjo nuk mund të bëhet në një vit ose në katër vjet. Ju e dini që na duhen të paktën gjashtë vjet për të krijuar një profil të një mjeku”, u përgjigj ai në një pyetje gazetareske, pasi vizitoi Klinikën e rindërtuar për Gjinekologji dhe Obstetrikë.
Ministri kujtoi gjithashtu se së bashku me Qeverinë do të blejnë 100 ambulanca, dhe për vitin 2027 njoftoi edhe 50 të tjera.
“Pra, në një kohë të shkurtër do të ketë edhe 150 ambulanca shtesë që do të pajisen në mënyrë të përshtatshme për t’u shërbyer qytetarëve tanë”, nënvizoi ministri.
Në parkingun e Qendrës Klinike “Nënë Tereza” mbretëron kaosi i përditshëm. Hapësira është shumë e vogël për të akomoduar makinat e mijëra pacientëve dhe punonjësve që qarkullojnë në këtë zonë çdo ditë. Nervozizmi fillon që para hyrjes në klinika – në rrugë ka radhë automjetesh që presin për të hyrë në njërën nga klinikat, ndërsa brenda, pasi të keni marrë biletë, është e vështirë të gjeni një vend parkimi. Pasi pacientët marrin shërbim mjekësor, ata detyrohen të presin përsëri në radhë dhe të paguajnë në kabinën “Parkingu i Qytetit” ose në makinë, dhe pastaj të presin përsëri dhe mezi të dalin nga zona Klinike me automjetet e tyre.
Parkimi në këtë pjesë të Shkupit është një problem kronik që asnjë ministër i shëndetësisë nuk ka gjetur kurrë një mënyrë për ta zgjidhur, megjithëse shumë prej tyre, kur u emëruan në detyrë, gjëja e parë që premtuan ishte pikërisht kjo – zgjidhja e problemit të parkimit.
Në 10 vitet e fundit, kanë ndryshuar 9 ministra të shëndetësisë. Imer Selmani, Bujar Osmani, Nikolla Todorov, Arben Taravari (2 mandate), Venko Filipçe, Bekim Sali, Fatmir Mexhiti, Ilir Demiri dhe Azir Aliu (aktual). Shumë prej tyre premtuan zgjidhjen e kaosit.
Ish-ministri i Shëndetësisë Fatmir Mexhiti, kur mori detyrën, tha në një takim informues me gazetarët se së pari do të merrej me kaosin me parkingun në Qendrën Klinike, por kjo nuk ndodhi.
Më 7 mars të këtij viti, kur Arben Taravari ishte ministër i Shëndetësisë, kompania “Gjoka Construction” nga Shqipëria ishte e vetmja që aplikoi në thirrjen e shpallur për menaxhimin e parkingut në Qendrën Klinike. Taravari tha se nuk e dinte se çfarë portofoli kishte kjo kompani. Kjo kompani duhej të ndërtonte garazhe shumëkatëshe brenda “gjashtë muajsh deri në një vit”, por kjo nuk ndodhi sepse qeveria nuk e miratoi planin që kjo kompani ta ndërtonte atë.