Në parkingun e Qendrës Klinike “Nënë Tereza” mbretëron kaosi i përditshëm. Hapësira është shumë e vogël për të akomoduar makinat e mijëra pacientëve dhe punonjësve që qarkullojnë në këtë zonë çdo ditë. Nervozizmi fillon që para hyrjes në klinika – në rrugë ka radhë automjetesh që presin për të hyrë në njërën nga klinikat, ndërsa brenda, pasi të keni marrë biletë, është e vështirë të gjeni një vend parkimi. Pasi pacientët marrin shërbim mjekësor, ata detyrohen të presin përsëri në radhë dhe të paguajnë në kabinën “Parkingu i Qytetit” ose në makinë, dhe pastaj të presin përsëri dhe mezi të dalin nga zona Klinike me automjetet e tyre, transmeton Portalb.mk.
Parkimi në këtë pjesë të Shkupit është një problem kronik që asnjë ministër i shëndetësisë nuk ka gjetur kurrë një mënyrë për ta zgjidhur, megjithëse shumë prej tyre, kur u emëruan në detyrë, gjëja e parë që premtuan ishte pikërisht kjo – zgjidhja e problemit të parkimit.
Në 10 vitet e fundit, kanë ndryshuar 9 ministra të shëndetësisë. Imer Selmani, Bujar Osmani, Nikolla Todorov, Arben Taravari (2 mandate), Venko Filipçe, Bekim Sali, Fatmir Mexhiti, Ilir Demiri dhe Azir Aliu (aktual). Shumë prej tyre premtuan zgjidhjen e kaosit, dhe premtimi i fundit vjen nga ministri aktual Aliu, i cili premton në profilin e tij në Facebook “një rritje të ndjeshme të kapaciteteve të parkimit dhe vendosjen e rendit”.
“Në seancë qeveritare u mor vendimi për të vazhduar procedurën për zgjidhjen e problemit të parkimit në zonën e Qendrës Klinike “Nënë Tereza”. Toka e hapësirës së parkimit do të regjistrohet në pronësi të Republikës së Maqedonisë së Veriut, me çka hiqet pengesa administrative për nënshkrimin e kontratës me Ndërmarrjen Publike “Parkingu i Qytetit – Shkup”. Kjo kontratë do të mundësojë modernizimin dhe rritjen e ndjeshme të kapaciteteve të parkimit, si dhe vendosjen e rendit. Ne parashikojmë monitorim të plotë të parkimit, tabela informuese dhe një udhëzues digjital që do t’i drejtojë qytetarët. Qëllimi që do të arrijmë do të jetë që pacientët dhe punonjësit të kenë qasje funksionale, të sigurt dhe të organizuar në kompleksin e klinikave”, tha Aliu.
Ish-ministri i Shëndetësisë Fatmir Mexhiti, kur mori detyrën, tha në një takim informues me gazetarët se së pari do të merrej me kaosin me parkingun në Qendrën Klinike, por kjo nuk ndodhi.
Më 7 mars të këtij viti, kur Arben Taravari ishte ministër i Shëndetësisë, kompania “Gjoka Construction” nga Shqipëria ishte e vetmja që aplikoi në thirrjen e shpallur për menaxhimin e parkingut në Qendrën Klinike. Taravari tha se nuk e dinte se çfarë portofoli kishte kjo kompani. Kjo kompani duhej të ndërtonte garazhe shumëkatëshe brenda “gjashtë muajsh deri në një vit”, por kjo nuk ndodhi sepse qeveria nuk e miratoi planin që kjo kompani ta ndërtonte atë.