Zëvendëskryeministri dhe ministri i Transportit, Aleksandar Nikolloski, është optimist se Rajoni i Ohrit do të arrijë ta ruajë statusin e trashëgimisë botërore natyrore dhe kulturore nën mbrojtjen e UNESCO-s dhe se nuk do të përfshihet në Listën e Trashëgimisë Botërore në Rrezik, transmeton Portalb.mk.
Duke iu përgjigjur pyetjeve të gazetarëve, Nikolloski deklaroi se optimizmi i tij bazohet në vizitën e misionit të UNESCO-s në vend muajin e kaluar, me përfaqësuesit e të cilit ai dhe zëvendësministrja e Transportit, Kaltrina Zekolli-Shaqiri, zhvilluan një takim.
“Po zhvillojmë një betejë të fortë, por mendoj se është shumë e rëndësishme që arritëm të sjellim në vendin tonë më shumë se 10 ambasadorë të vendeve anëtare të UNESCO-s. Janë pikërisht ata që votojnë,” tha Nikolloski.
Ai shtoi se javën e ardhshme në Korenë e Jugut do të nisë sesioni i Asamblesë së Përgjithshme të UNESCO-s, në kuadër të Kombeve të Bashkuara, pas së cilës, sipas tij, situata do të bëhet më e qartë.
Duke folur në këtë kontekst, Nikolloski tha se, edhe pse nuk dëshiron të japë deklarata para kohe, shpreson se vendi do të arrijë të shmangë atë që e cilësoi si skenarin më kritik – përfshirjen e Rajonit të Ohrit në Listën e Trashëgimisë Botërore në Rrezik.
“Sa i përket pikës më kritike, nëse Rajoni i Ohrit do të shpallet zonë e rrezikuar, nuk dua të jap deklarata të parakohshme, por mendoj se do të arrijmë ta shmangim këtë,” u shpreh Nikolloski.
Ai i bëri këto komente gjatë inspektimit të rrugës së rikonstruktuar “Shtipska” në Tetovë, së bashku me kryetarin e Komunës së Tetovës dhe bashkëkryetarin e koalicionit VLEN, Bilall Kasami.
Në këtë kontekst, Nikolloski përmendi edhe autostradën Trebenishtë–Qafë Thanë, për të cilën UNESCO kishte shprehur rezerva nëse duhej të ndërtohej. Sipas tij, pas vizitës së misionit të UNESCO-s, nuk vihet më në pikëpyetje ndërtimi i autostradës, por mbetet vetëm të zgjidhet traseja.
“Tashmë nuk është çështje nëse do të ndërtohet autostrada. Kjo ishte dilema para se të vinte misioni, pasi kishte mendime që projekti të ndalohej plotësisht. Tani mbetet vetëm të zgjidhet traseja. Kjo është shumë më pozitive, sepse në fund të ditës, pavarësisht nëse kalon një kilometër më majtas apo më djathtas, autostrada do të realizohet. Prandaj jam shumë më optimist pas përfundimit të misionit që na vizitoi,” deklaroi Nikolloski.
Verën e kaluar, Komiteti i Trashëgimisë Botërore të UNESCO-s vendosi të shtyjë përfshirjen e Rajonit të Ohrit në Listën e Trashëgimisë Botërore në Rrezik, duke u dhënë Maqedonisë së Veriut dhe Shqipërisë edhe një vit kohë për të përmbushur një sërë detyrimesh dhe për të zbatuar rekomandimet e evidentuara në raportet e mëparshme të misioneve monitoruese.
Në shkurt të këtij viti, një delegacion qeveritar i udhëhequr nga zëvendëskryeministri dhe ministri i Transportit, Aleksandar Nikolloski, zhvilloi një vizitë dyditore pune në Paris, ku u takua me drejtuesit e UNESCO-s për të theksuar angazhimin e Maqedonisë së Veriut për ruajtjen e statusit të Rajonit të Ohrit si trashëgimi botërore natyrore dhe kulturore.