I vetmi TEP skaner në vend vazhdon të mos funksionojë për shkak të problemit me pajisjet e nevojshme për funksionimin e tij. Nga Instituti Universitar për Tomografi me Emision Pozitron (IU TEP ) për Meta thanë se serviseri i autorizuar po punon për mënjanimin e defektit, transmeton Portalb.mk.
Ky incizim është i rëndësishëm për pacientët onkologjikë, pasi zbulon dhe lokalizon tumoret, përcakton nëse dhe ku është përhapur kanceri dhe nëse terapia ka efekt, gjë që u ndihmon mjekëve të vendosin se si të vazhdojë trajtimi.
Ndërkohë, pacientët prej muajsh presin për kontrolle PET/CT. Një pjesë e pacientëve janë të detyruar të kërkojnë alternativa jashtë vendit ose në institucione private shëndetësore, ku një incizim kushton rreth 1.300 euro.
“PET-skaneri ka problem në prodhimin e radioizotopeve. Serviseri i autorizuar po punon intensivisht për zgjidhjen e këtij problemi dhe janë ndërmarrë të gjitha hapat që sa më shpejt ciklotroni të vihet në funksion. Gjatë viteve të fundit nuk është ndjekur protokolli për mirëmbajtjen parandaluese të pompës së difuzionit, pastrimin e saj dhe ndërrimin e vajit çdo pesë vjet. Ky menaxhment i ka ulur listat e pritjes përmes rritjes së numrit të kontrolleve PET/CT në nivel vjetor dhe futjes së shërbimeve të reja shëndetësore. Për situatën janë informuar edhe Klinika e Onkologjisë dhe Radioterapisë dhe Klinika e Hematologjisë, për triazhimin e mëtejshëm të pacientëve përmes metodave të tjera diagnostikuese. Procesi i prodhimit do të vazhdojë sapo të eliminohen të gjitha defektet dhe të përmbushen të gjitha kushtet për funksionimin e pandërprerë të pajisjes, siç kërkojnë protokollet“, thuhet në përgjigjen e institucionit.
Meta transmetoi dëshminë e një pacienteje onkologjike, identiteti i së cilës është i njohur për redaksinë, e cila tha se skaneri PET/CT nuk funksionon prej dy deri në tre muajsh. Në një periudhë aparati ishte vënë sërish në funksion, por vetëm për disa ditë, pas së cilës incizimet u ndërprenë përsëri.
“Mjeku më këshilloi të mos prisja, sepse me siguri do të duhej të kalonin edhe disa muaj. Prandaj vendosa që incizimin ta bëja jashtë vendit. Pas disa muajsh terapi duhej të bëja një pauzë për të parë se cila ishte gjendja dhe si të vazhdonim, por për këtë nevojitet një incizim i ri. Ja, tashmë është muaji i tretë që nuk mund ta bëj“, thotë pacientja.
Ajo shpjegon se pa rezultatet, mjeku nuk mund të vlerësojë nëse terapia ka dhënë rezultat dhe nëse duhet të vazhdohet, të ndërpritet apo të ndryshohet.
Edhe vetë UI PET, në faqen zyrtare, e cila ndërkohë ridrejton drejt përmbajtjeve të dyshimta në internet, thekson se incizimet PET/CT përdoren për përcaktimin e fazës së sëmundjes, planifikimin e radioterapisë ose kimioterapisë, ndjekjen e efekteve të terapisë së aplikuar dhe zbulimin e rikthimit të sëmundjes.
Dëshmi të ngjashme ndahen edhe në grupet mbështetëse për pacientët onkologjikë në rrjetet sociale. Në grupin në Facebook “Nuk je vetëm në këtë luftë“, një paciente më 20 korrik ka shkruar se nga Instituti ka marrë informacion se servisimi është në proces dhe se deri në fund të muajit me shumë gjasë nuk do të ketë incizime.
“Edhe unë po pres, tashmë tri herë më kanë kthyer mbrapsht“, ka shkruar një paciente tjetër.
Problemi bëhet edhe më serioz pasi shëndetësia publike disponon vetëm me një PET/CT-skaner.
Në raportin e revizionit për shfrytëzimin e pajisjeve moderne mjekësore, Enti Shtetëror i Revizionit ka konstatuar se Instituti Universitar për Tomografi me Emision Pozitron (IU TEP) është institucioni i vetëm publik në vend i specializuar për incizime PET/CT dhe se disponon me një skaner.
Në periudhën nga viti 2021 deri në vitin 2023 janë realizuar 6.457 udhëzime, përkatësisht mesatarisht rreth 180 incizime në muaj. Kapaciteti maksimal i pajisjeve në dispozicion, sipas informacioneve që IU TEP ua ka dorëzuar revizorëve, ishte 13 pacientë në ditë.
Revizorët kanë vlerësuar se me blerjen e një skaneri të dytë do të rritej qasja dhe numri i shërbimeve. Për aparatin e dytë tashmë ishte siguruar edhe hapësirë e përshtatshme në Institut.