Ministri i Shëndetësisë, Fatmir Mexhiti, i cili është njëri nga tre ministrat e Aleancës së Shqiptarëve, sot deklaroi se i jep mbështetje të plotë, siç tha, kryetarit legjitim të partisë Arben Taravari, i cili paralajmëroi se në zgjedhje partia do të bëjë koalicion me partitë opozitare. I pyetur nëse do ta informojë kryetarin e qeverisë teknike Talat Xhaferi se a ndihet pjesë e qeverisë apo jo, Mexhiti tha se nuk ka nevojë t’i përgjigjet askujt përveç partisë së tij dhe kryetarit të saj, transmeton MIA.
Mexhiti, shtoi se nuk ka arsye pse të jepë dorëheqje, pas ngjarjeve të fundit në partinë e cila e ka propozuar për ministër, Aleanca për Shqiptarët.
“Gjithmonë kam qenë pas Taravarit. Unë dhe Taravari jemi si një trup dhe një shpirt. Kemi qenë cimera, jemi miq, jemi shokë, bashkëpartiakë dhe bashkëpunëtor në punën e përditshme si neurolog. ASH është një, ASH ka kryetarin legjitim edhe ASH do të vazhdojë me politikat e saja, posaçërisht me politikat shëndetësore që vërtet ky shtet i ka 30 vitet e fundit, për këta 11 muaj. A mundet më mirë, mundet shumë ma mirë, për gjithçka tjetër do të jeni të informuar nga organet e partisë. Do t’i ndjekim se si do të ecin rastet, ne nuk kemi pse të japim dorëheqje prej postit të ministrit të Shëndetësisë”, shtoi Mexhiti.
Kujtojmë se përplasjet brenda partisë nisën kur kryetari i Aleancës për Shqiptarët, Arben Taravari, vendosi që të shkojë në zgjedhjet parlamentare me opozitën shqiptare, Lidhjen Evropiane për Ndryshim. Nga ana tjetër kryetari i Kuvendit të ASH-së, Ziadin Sela i ka drejtuar akuza të rënda Taravarit, duke thënë se ai po mundohet që të përçajë partinë dhe se, në dy muajt e fundit nuk i ka thirrur organet e larta partiake, si dhe ka shtuar se, partisë nuk i duhet “kryetar rrjetesh sociale”. Sela, në konferencën e 3 shkurtit për shtyp kërkoi të shkarkohet Taravari pasi që sipas tij, e ka shkelur rëndë statutin e partisë.
Pas kësaj përplasjeje, në oborrin e shtëpisë së kryetarit të Aleancës për Shqiptarët dje në mëngjes ishte gjetur plumb i pashkrepur, ndërkaq autoritetet policore po e shqyrtojnë rastin.
Pos këtyre rasteve, me 4 shkurt kishte edhe një incident tjetër, gjegjësisht drejtori i Agjencisë për Menaxhim me Pronat e Konfiskuara, kuadër i Aleancës për Shqiptarët, mbështetës i Selës ka raportuar në polici se është sulmuar fizikisht në një restorant në Tetovë nga Krenar Osmani, udhëheqës i tifo-grupit “Ballistës”, i afërt me Taravarin. Nebiu thotë se nuk e njeh Osmanin, ndërkaq motivi sipas tij, mund të jetë ose për profesionin që ushtron ose për partinë.