Sipas anketës së fundit të Eurobarometrit, në Maqedoninë e Veriut, 54% e qytetarëve i besojnë Bashkimit Evropian, ndërsa 42% jo. Në vendet e Ballkanit Perëndimor besimi në BE është më i lartë në Mal të Zi dhe Shqipëri, dhe më i ulëti në Serbi, transmeton Portalb.mk.
Në krahasim me vitin e kaluar, Eurobarometri i vjeshtës 2024 tregoi se 56% e qytetarëve në Maqedoninë e Veriut i besojnë Bashkimit Evropian.
Kur bëhet fjalë për Ballkanin Perëndimor, 83% e qytetarëve në Mal të Zi kanë tendencë t’i besojnë BE-së, ndërsa 17% kanë tendencë të mos e besojnë atë. Qytetarët në Shqipëri dhe Kosovë gjithashtu kanë nivele të larta besimi në BE – 80% dhe 79%.
Besimi në BE është më i ulët në Maqedoninë e Veriut dhe Bosnjë-Hercegovinë, por ende mbi 50%. Në Maqedoninë e Veriut, 54% e qytetarëve thonë se kanë tendencë t’i besojnë BE-së, ndërsa 42% kanë tendencë të mos e besojnë atë. Në Bosnjë-Hercegovinë, 58% e qytetarëve i besojnë BE-së, ndërsa 37% nuk e besojnë atë.
Në Serbi, nga ana tjetër, vetëm një pakicë njerëzish i besojnë BE-së – 37%, ndërsa 57% thonë se kanë tendencë të mos e besojnë atë, tregojnë rezultatet e një ankete të publikuar më 28 maj.
Kush është më optimist për anëtarësimin në BE?
Kur bëhet fjalë për anëtarësimin në BE, situata në rajon është e ngjashme. Më shumë se 80% e qytetarëve në Mal të Zi dhe Shqipëri besojnë se do të ishte një gjë e mirë.
Në Maqedoninë e Veriut dhe Bosnjë-Hercegovinë, ky numër është midis 50% dhe 60%, ndërsa në Serbi, vetëm 34% e qytetarëve thonë se anëtarësimi do të ishte një gjë e mirë, ndërsa 32% besojnë se anëtarësimi do të ishte një gjë e keqe.
Të anketuarit në BE u pyetën nëse do të mbështesnin “zgjerimin e BE-së për të përfshirë vende të tjera në vitet e ardhshme”. Në BE në tërësi, 54% e qytetarëve e mbështesin këtë politikë, ndërsa 39% janë kundër saj.
Zgjerimi i BE-së ka shumicën e mbështetjes në shumicën e shteteve anëtare, por shumica e qytetarëve në Gjermani dhe Austri janë kundër tij. Në të dy vendet, 42% e qytetarëve janë në favor të zgjerimit, ndërsa 53% janë kundër tij.
Në Francë, 41% e qytetarëve janë në favor të zgjerimit, ndërsa 49% janë kundër, megjithëse numri i kundërshtarëve është ulur që nga Eurobarometri i mëparshëm.
Kujtojmë se, bllokimi i rrugës drejt BE-së, duke mos plotësuar kërkesën e BE-së për ndryshime kushtetuese, është shkaktar i rënies së besimit të qytetarëve në Bashkimin Evropian. Qëndrimi i qeverisë aktuale në këtë drejtim është tregues se debllokimi i rrugës është i pamundshëm dhe si rrjedhojë edhe në të ardhmen gjasat për të rënë besimi në BE është edhe më i madh. VMRO-DPMNE, partia udhëheqëse me qeverinë qëndron e palëkundur në doktrinën e saj politike, për të mos bërë kompromis me askënd, edhe përkundër pasojave politike.
Vizitat e fundit të krerëve të BE-së betonojnë qëndrimin e Brukselit se, Maqedonia e Veriut duhet t’i bëjë ndryshimet kushtetuese për të vazhduar rrugën drejt BE-së dhe se shtimi i bullgarëve dhe etnive tjera në Kushtetutë është për të mirën e vendit. Kjo vjen si rezultat i asaj që Maqedonia e Veriut pas 17 vitesh me 19 korrik të vitit 2022 filloi bisedimet qasëse me BE-në me mbajtjen e konferencës së parë ndërqeveritare, pas miratimit të propozimit francez të cilin Maqedonia e Veriut e miratoi më 16 korrik 2022.