Hulumtimi ndërkombëtar i Laboratorit të Gazetarisë Hulumtuese (IRL) dhe partnerëve të saj, për herë të parë, i lidh të gjitha hallkat e rrjetit të paqartë ballkano-amerikan, duke zbuluar se si ndërtimi i aeroportit të ri me rëndësi strategjike në Vlorë ndërthuret me figura politike kontroverse dhe miliarderë të fuqishëm botërorë. Derisa në terren projekti po realizohet nga një oligark ballkanik dhe një konsull nderi nga Maqedonia e Veriut me dosje policore, prapa skenës, përmes një trekëndëshi të ndërlikuar financiar në Maltë dhe Luksemburg, fshihet një linjë kredie prej 100 milionë eurosh. Në këtë linjë kredie, si investitor kryesor, shfaqet kompania që administron kontabilitetin e fondeve private saudite të Jared Kushnerit, dhëndrit të presidentit amerikan Donald Trump, projektet e paralajmëruara mega-turistike të të cilit prej muajsh kanë tronditur Shqipërinë, transmeton Portalb.mk.
Emri i Jared Kushner, dhëndrit të Donald Trump-it, për muaj të tërë po shkakton protesta masive dhe të ashtuquajturin Revolucion Flamingo në Shqipëri. Por, përveç projekteve të planifikuara të luksoze turistike të fondit të tij “Affinity Partners” në Shqipëri, Laboratori i Gazetarisë Hulumtuese (IRL) nga Shkupi dhe organizata mediatike “Shteg” nga Tirana zbuluan një rrjet të fshehtë ndërkombëtar për financimin e ndërtimit të aeroportit të ri në Vlorë, në të cilin ka luajtur rol edhe Konsulli i Nderit i Maqedonisë në Kosovë.
Hulumtimi zbulon se “SEI Investments Company” – kompania që e kryen kontabilitetin e fondeve private të Kushner-it, e mbështetur nga Arabia Saudite – shfaqet si investitor në një linjë kreditore pa një strukturë transparente në shumën prej 100 milionë eurosh për ndërtimin e aeroportit në Vlorë. Paratë janë lëshuar përmes një trekëndëshi kompleks fondesh private të sapokrijuara në Maltë dhe Luksemburg, gjë që e bën të pamundur zbulimin e pronarëve të vërtetë.
Skandali po merr një dimension të fuqishëm rajonal, pasi një nga dy kompanitë që po e ndërtojnë aeroportin i përket Valon Ademit, Konsullit të Nderit të Maqedonisë në Gjilan, Kosovë. Ademit iu dha ky post diplomatik nga Qeveria e Maqedonisë pavarësisht se më parë ishte shkarkuar nga Shqipëria, edhe pse ishte denoncuar në policinë e Kosovës për kërcënime, ndërsa kompanitë e familjes së tij janë lidhur me parregullsi në tendera. Përderisa Prokuroria Speciale e Shqipërisë (SPAK) tashmë ka ngritur akuza për manipulim të tenderit ndërkombëtar për aeroportin, hulumtimi i IRL-së për herë të parë zbulon një lidhje midis financimit të aeroportit, kompanive të lidhura me fondet e dhëndrit të Trump-it dhe qarqeve të errëta politike dhe afariste në Ballkan.
Shqipëria e shkarkoi, Maqedonia e mori
Valon Ademi (38) nga Kosova ka një karrierë të pazakontë, ai qarkullon si Konsull i Nderit nëpër vendet e Ballkanit që nga vitet e njëzeta, edhe pse në publik nuk njihet për ndonjë punë të rëndësishme shoqërore.
Pasi ishte Konsull i Nderit i Shqipërisë në Gjilan të Kosovës deri në vitin 2019, nga viti 2020 Maqedonia e Veriut i ka caktuar atij të njëjtin funksion edhe pse Tirana zyrtare paraprakisht kishte vendosur që ta ndërpresë bashkëpunimin me të.
Në diplomaci Konsull i Nderit nuk merr pagë për shërbimin dhe puna është mbi bazë vullnetare. Por, ky titull jep një vulë institucionale dhe mundëson qasje në qarqet e mbyllura të biznesit dhe ngjarjet diplomatike ku shpesh pjesë e të ftuarve janë zyrtarë qeveritarë ose biznesmenë. Përveç kësaj ai mundëson edhe ngritje të reputacionit dhe prestigj shoqëror.
Në këmbim, nëpërmjet funksionit si Konsull, personi ka për detyrë t’i promovojë interesat e qytetarëve të vendit që ia jep funksionin në vendin e tij të origjinës dhe të punojë për t’i thelluar marrëdhëniet në plan kulturor, shoqëror dhe ekonomik. Por, me sa duket, Konsulli i ri i Nderit ka punuar për t’i forcuar pozicionet e tij afariste në Shqipëri. Përmes kompanisë së tij kah mesi i vitit 2021 Ademi u bë bashkëpronar i një kompanie për shërbime aeroportuale në Shqipëri në qytetin e Vlorës – projekt ky për të cilin ju nevojitet leje nga Kryeministri i Shqipërisë Edi Rama.
Aeroporti me rëndësi strategjike, i cili është ende në ndërtim e sipër, ndodhet vetëm pak kilometra nga vendet ku do të ndërtohen mega-projektet turistike pranë lagunës Vjosë-Nartë dhe ishullit të Sazanit. Ato do t’i ndërtojnë kompani të lidhura me dhëndrin e Presidentit të SHBA-ve Donald Trump, Jared Kushner, i cili është i martuar me vajzën e tij Ivanka.
Por, në Shqipëri, nga fundi i majit të këtij viti, filloi i ashtuquajturi Revolucioni Flamingo, i udhëhequr kryesisht nga të rinjtë shqiptarë. Në këto protesta kërkohet ndalimi i projekteve turistike, burgosja e Kryeministrit Edi Rama dhe udhëheqësit të opozitës Sali Berisha, si dhe formimi i një opsioni të tretë politik në vend.
Derisa publiku është i përqendruar te protestat dhe projektet e Jared Kushner, Laboratori i Gazetarisë Investigative (IRL) zbuloi se si po kreditohet ndërtimi i aeroportit në Vlorë, ku Konsulli ynë i Nderit është një nga protagonistët kryesorë dhe cila është lidhja me familjen e Donald Trump.
Konsulli i Nderit është një titull që Maqedonia e Veriut e ndan në vende ku paraqitet nevoja. I tillë ishte edhe rasti me Kosovën. Sipas udhëzimeve të Ministrisë së Punëve të Jashtme (MPJ), personi i cili propozohet për këtë pozicion duhet të jetë një mik i dëshmuar dhe të ketë respekt dhe simpati për vendin dhe qytetarët e tij.
Ai është emëruar në atë pozicion me vendim të Qeverisë së Zoran Zaevit në dhjetor të vitit 2020. Vendimin e ka nënshkruar zëvendëskryeministri i atëhershëm Аrtan Grubi nga radhët e BDI-së kur ministër i punëve të jashtme ishte bashkëpartiaku i tij Bujar Osmani.
Më 29 dhjetor të vitit 2020 vendimi për Ademin është botuar në Gazetën Zyrtare të Maqedonisë.
Përpara se të bëhet Konsull i Nderit i Maqedonisë Ademi ka qenë Konsull i Nderit i Shqipërisë në Gjilan. Por, ministri i atëhershëm i punëve të jashtme i Shqipërisë, Gent Cakaj, në korrik të vitit 2019 ia ka ndërprerë mandatin. Në shkresën e MPJ të Shqipërisë drejtuar Ambasadës së Shqipërisë në Prishtinë nuk janë dhënë arsyet e një vendimi të tillë.
Por sipas medias hulumtuese Insajderi në Kosovë, kompania ALKO-IMPEX General Construction, në të cilën Ademi është një nga partnerët, dyshohet se ka qenë e përfshirë në parregullsi në tenderët publikë në Shqipëri.
Ai gjendet edhe në evidencat policore në Kosovë. Në shkurt të vitit 2020, disa muaj para se të bëhej Konsull i Nderit i Maqedonisë, Ademi është denoncuar në policinë e Kosovës nga sekretari i atëhershëm i Ministrisë së Infrastrukturës dhe Mjedisit Jetësor të Kosovës, Betim Reçica, për shkak të kërcënimeve të bëra kundër tij dhe familjes së tij. Përmes një partneri mediatik në Kosovë IRL e kontaktoi Reçicën që të na shpjegojë se çfarë ka ndodhur, por ai refuzoi.
I denoncuar në polici për shkak të rrahjes së një drejtori
Në fund të muajit janar të vitit 2026 Valon Ademi është denoncuar në polici edhe për sulm fizik ndaj drejtorit të investimeve kapitale në Komunën e Prishtinës, Sokol Havolli. Incidenti ka ndodhur më 30 јаnar në një lokal në Prishtine, ku Ademi e ka goditur me grusht Havollin. Policia e Kosovës na e konfirmoi incidentin.
Një vit e gjysmë pasi ai iu ndërpre mandati si Konsull i Nderit i Shqipërisë, Ademit iu dha përsëri i njëjti titull, por nga Maqedonia.
Sipas dokumenteve të cilat Ministria e Punëve të Jashtme në Shkup ia dorëzoi IRL-së bazuar në Ligjin për Qasje të Lirë në Informacion me Karakter Publik, rekomandim për t’u emëruar Konsull i Nderit i Maqedonisë Ademi mori nga Ambasada e Maqedonisë në Prishtinë dhe nga ministri i atëhershëm i ekonomisë i Kosovës, Edmond Shala.
“Në atë periudhë ne kishim një politikë të zgjerimit të rrjetit të Konsujve të Nderit, kështu që të gjitha ambasadave tona iu dërguar kërkesë që të propozojnë kandidatë adekuat. Gjatë përzgjedhjes nuk vlerësohet vetëm ajo që kandidati e ka bërë në të kaluarën për marrëdhëniet dypalëshe, por mbi të gjitha potenciali i tij për të kontribuar në të ardhmen”, shpjegoi atëkohë për IRL ministri i atëhershëm i punëve të jashtme, Bujar Osmani.
Por, nga MPJ na thanë se në periudhën para vitit 2020, kur ka filluar procedura për Ademin, vendi nuk ka pasur ambasador në Prishtinë.
“Për një periudhë të gjatë kohore Ambasada e Republikës së Maqedonisë së Veriut në Republikën e Kosovës drejtohej nga ushtrues të detyrës ambasador”, thanë nga Ministria.
Ambasadorët në detyrë u emëruan nga radhët e punonjësve të Ministrisë së Punëve të Jashtme, u dërguan me mandat ose si ndihmës në ambasadë.
Dokumentet e Ministrisë së Punëve të Jashtme mbi emërimin e Valon Ademit janë zhdukur
Dosja të cilën IRL e mori nga Ministria e Punëve të Jashtme mbi procesin e emërimit të Ademit është pothuajse bosh. Në të kishte vetëm një fotokopje të vendimit të botuar në Gazetën Zyrtare. Një javë më vonë shërbimet arritën të gjenin edhe katër dokumente të tjera:
Sipas Udhëzuesit për udhëheqjen e procedurës për emërimin e konsujve të nderit të vendit jashtë vendit të miratuar në vitin 2008 dhe sipas të cilit është zhvilluar procedura për Valon Ademin, MPJ në dosjen e tij duhet të ketë dokumente ose prova të paktën për sa vijon:
- Të jetë mik i dëshmuar ose të ketë simpati, respekt për Republikën e Maqedonisë dhe qytetarët e Republikës së Maqedonisë.
- Të ketë shtetësi të shtetit nikoqir, me vendbanim të përhershëm dhe adresë në selinë e ardhshme të përfaqësisë konsullore.
- Të punojë në territorin e zonës konsullore.
- Të mos jetë më i vjetër se 70 vjet.
- Të mos jetë dënuar për krime të dënueshme me burgim prej të paktën gjashtë muajsh, për krime që lidhen me aktivitetin e tij zyrtar ose ndonjë krim tjetër që e bën atë të padenjë për ta kryer funksionin e konsullit të nderit.
- Të jetë person i afirmuar në fushat e veprimtarisë së tij profesionale.
- Të ketë ndikim në jetën publike, politike, ekonomike ose kulturore të shtetit nikoqir.
- Ta flasë rrjedhshëm gjuhën zyrtare të shtetit nikoqir; e dëshirueshme, por jo e detyrueshme, ta flasë gjuhën maqedonase.
- Të jetë i sigurt financiarisht, nga burimet e veta ose përmes sponsorizimeve nga subjekte private ose shtetërore në vendin nikoqir, për mbulimin e buxhetit të përfaqësisë konsullore.
- Të ketë kushte për të siguruar ambiente të përshtatshme konsullore për kryerjen e funksioneve konsullore.
- Të plotësojë kushte të tjera të nevojshme për funksionimin normal të misionit konsullor (pajisje, etj.).
Në MPJ nuk gjetën materiale të tilla për Valon Ademin, si dhe nuk u përgjigjën pyetjeve nëse kishin nisur një hetim të brendshëm dhe nëse Ademi ishte ende Konsull i Nderit.
IRL iu drejtua ish ministrit Bujar Osmani për atë se në bazë të cilave dokumente ishte sjellë vendimi për Ademin, duke pasur parasysh se në Ministrinë e Punëve të Jashtme për momentin mungon një pjesë e madhe e dokumentacionit për të?
“Propozimet kalojnë nëpër procedurën e rregullt të shqyrtimit në shërbimet përkatëse dhe nëse i plotësojnë kushtet ato i dorëzohen Qeverisë, e cila e merr vendimin përfundimtar për emërimin”, na tha Osmani.
IRL kërkoi takim me Ademin, por përgjigje nuk morëm. Dërguam edhe pyetje në adresën elektronike të kompanisë së tij “2A Group” në Kosovë, por as nga atje nuk morëm përgjigje.
Konsulli hyn në biznesin për aeroportin
Pothuajse paralelisht me procesin e zyrtarizimit të statusit konsullor të fituar nga Maqedonia, Valon Ademi ka drejtuar edhe një operacion tjetër kompleks.
Ai ka hyrë në një procedurë për pjesëmarrje në tender për fitimin e një koncesioni 35-vjeçar nga Shqipëria për ndërtimin dhe menaxhimin e një aeroporti të ri në afërsi të qytetit turistik bregdetar të Vlorës.
Partneri i tij në këtë sipërmarrje është një nga shqiptarët më të pasur në botë, Bexhet Pacolli, biznesmen dhe ish-president i Kosovës.
Kompania Mabco Constructions SA, në pronësi të Pacollit dhe 2A Group, kompania familjare e Ademit, kanë pasur marrëveshje për të marrë pjesë së bashku në tender.
Vetëm një javë para se Ademi të bëhej Konsull i Nderit i Maqedonisë, më 22 dhjetor të vitit 2020, është nënshkruar marrëveshje e përkohshme për konsorcium me kompaninë turke YDA Insaat Sanayi Ve Ticaret Anonim Sirketi. Kjo ka pasur përvojë në menaxhimin e aeroporteve, që ishte një nga kushtet kryesore që kompanitë e Ademit dhe Pacollit të mund të konkurronin në tender.
Në vitin 2021 konsorciumi i përbërë nga 2A Group, Mabco constructions SA dhe YDA Insaat Sanayi Ve Ticaret Anonim Sirketi turke e fitoi koncesionin 35-vjeçar nga Ministria e Infrastrukturës së Shqipërisë për ndërtimin dhe menaxhimin e aeroportit të ri.
Por tani, pesë vjet më vonë, ende nuk dihet se kur do të përfundojë ndërtimi i tij. Arsyeja për këtë është procedura gjyqësore e ngritur pikërisht nga Konsulli ynë i Nderit.
Kredi prej 100 milionë eurosh nga Luksemburgu përmes një fondi nga Malta
Çdo gjë ka filluar pasi në vitin 2018 Qeveria shqiptare dorëzoi në Parlament propozim-ligjin që konsorciumi turk Cengiz Construction – Kalyon – Kolin Construction ta ndërtojë aeroportin dhe për kështu të anashkalohet nevoja për një tender ndërkombëtar.
Kjo ngjalli reagim te Komisioni Evropian, i cili theksoi se është qenësore që prokurimet publike në Shqipëri të zbatohen mbi bazë të mosdiskriminimit. Në fillim të vitit 2019 procedura u ndërpre, ndërsa në dhjetor të të njëjtit vit u shpall tender për koncesion 35-vjeçar në Aeroportin e Vlorës, në të cilin u përzgjodh oferta e konsorciumit të lartpërmendur.
Për ta financuar ndërtimin e aeroportit, Mabco Constructions SA dhe 2A Group në vitin 2023 fillimisht kanë marrë një kredi nga Banka Kombëtare Tregtare (BKT) me vlerë prej 56 milionë euro. Për këtë, Mabco e Bexhet Pacollit nën hipotekë ka vënë një nga hotelet e tij dhe një fabrikë gypash.
Konkretisht, nën hipotekë janë vënë Hoteli Swiss Diamond (i vlerësuar 33 milionë euro) dhe Fabrika e gypave IMK përmes Mabetex Holding (e vlerësuar 42 milionë euro).
Në vitin 2025 Mabco ka lidhur një marrëveshje të re me një huadhënës tjetër për një linjë kreditore prej 100 milionë eurosh. Kompania e Ademit, 2A Group, nuk ka marrë pjesë në këtë marrëveshje.
Fituesi i koncesionit për aeroportin i dakorduar paraprakisht
Nga Organi Special për Luftë Kundër Korrupsionit i Shqipërisë (SPAK) në fillim të muajit prill të vitit 2026 njoftuan se tre zyrtarë të Ministrisë së Infrastrukturës dhe Energjetikës janë akuzuar se me veprimin ose mosveprimin e tyre e kanë favorizuar konsorciumin fitues “Mabco – YDA – 2A Group” në tenderin për aeroportin e Vlorës.
Hetimin e ka drejtuar udhëheqësi i SPAK, Klodian Braho. Të tre kanë qenë anëtarë të komisionit të vlerësimit për tenderin dhe tani akuzohen për veprën penale të shkeljes së barazisë në tendera.
Por, në vend që të merrte një kredi bankare tjetër, këtë herë Mabco ka vendosur që të kërkojë para përmes një fondi privat, pra duke lëshuar fletëobligacione. Këto janë letra me vlerë që i blejnë investitorët dhe në këtë mënyrë e financojnë kredinë.
Në këtë rast kjo është bërë nëpërmjet Delphos Securities SARL, një fond në Luksemburg që ëhtë themeluar më 4 nëntor të vitit 2024, vetëm pesë muaj para se të merrej kredia.
Për të IRL zbuloi se e ka themeluar Fondazione Delphos, një fondacion nga Malta, pak para lidhjes të marrëveshjes për linjën kreditore me Mabco Constructions SA.
Nga ana tjetër, fondacioni në Maltë është regjistruar më 16 shtator të vitit 2024, vetëm dy muaj para se ta themelonte fondin në Luksemburg.
Publiku nuk mund ta zbulojë se kush është pronar i Fondazione Delphos sepse Malta, e cila është anëtare e BE-së, nuk ka një regjistër të disponueshëm publikisht me detaje për pronarët e fundit të vërtetë (UBO) të fondacioneve.
Siç parasheh Kodi Civil i Maltës, me të cilin rregullohen fondacionet, shoqatat dhe llojet e tjera të personave juridikë, në të dhëna të tilla mund të kenë qasje vetëm autoritetet kombëtare tatimore malteze, autoritetet kundër pastrimit të parave dhe financimit të terrorizmit.
Përndryshe në marrëveshjen midis Mabco dhe Delphos Securities SARL është futur edhe kompania VIA, e cila në dokument është shënuar si “huamarrës shtesë”. Por, IRL zbuloi se në dokument nuk ka vulë të VIA-s, e as nënshkrim të menaxherit të saj në atë kohë.
Pavarësisht kësaj, nga kompania e Pacollit – Mabetex Group, kompania amë e Mabco Constructions, pretendojnë se VIA nuk është palë në marrëveshjen për kredinë.
“VIA nuk ka qenë kurrë, nuk është dhe nuk do të jetë palë në marrëveshjen për financim me Delphos,” shkruan nga Mabetex Group në faqen e tyre në Facebook, pas mbajtjes së Asamblesë së Përgjithshme të partnerëve të VIA-s më 18 qershor të vitit 2026 në Tiranë.
Një ish-zyrtar i lartë nga një bankë evropiane me operacione globale për IRL tha se nuk mund ta kuptonte pse Mabco Constructions zgjodhi të merrte një linjë të tillë kreditore përmes një fondi të lidhur me Maltën dhe Luksemburgun – me një normë interesi dukshëm më të lartë – në vend që ta kalonte përmes një banke konvencionale tregtare.
Duke folur në kushte anonimiteti për shkak të ish-pozicionit të tij lartë, burimi theksoi se ka të ngjarë të ketë një marrëveshje shtesë të rregulluar midis huadhënësit – në këtë rast Delphos Securities SARL – dhe investitorëve në fond.
“Është shumë e mundur që të ketë një marrëveshje shtesë të brendshme midis fondit dhe njërit ose të gjithë pronarëve të fletëobligacioneve, në të cilën janë përcaktuar detajisht marrëdhëniet midis tyre dhe fondit të Luksemburgut. Sipas një marrëveshjeje të tillë, fondi mund t’ua dorëzojë atyre të drejtat e tij për hipotekat, ose mund të jetë diçka krejtësisht ndryshe”, tha ai për IRL.
IRL kërkoi takim me Bexhet Pacollin, por as nga ai nuk morëm përgjigje. Përveç kësaj me email dërguam pyetje edhe te Mabco, te menaxherët e Delphos Securities SARL në Luksemburg, te kompania Promethean në Maltë, e cila është e listuar si zyra e kontabilitetit e Fondazione Delphos (për të cilën nuk ka adresë kontakti), dhe te Delphos në Uashington. U bëmë disa pyetje përmes të cilave kërkuam përgjigje në lidhje me rolin e tyre në kreditimin dhe ndërtimin e aeroportit të Vlorës.
IRL nuk mori përgjigje nga askush. E vetmja kompani që na kontaktoi ishte Promethean nga Malta. Ata na kërkuan t’ua dërgonim tekstin ku përmendej Fondazione Delphos. IRL i refuzoi sepse nuk është në frymën e etikës gazetareske dhe profesionale të ndahen materiale që nuk janë publikuar ende. Nuk na kontaktuan më.
Investitor në kredi, kompania që e bën kontabilitetin për dhëndrin e Trump-it
Por cilët në të vërtetë janë investitorët që blenë fletëobligacione, domethënë që e financuan linjën kreditore prej 100 milionë eurosh?
Delphos Securities SARL obligacionet përmes të cilave duhej t’i mblidhte 100 milionë eurot e nevojshme i ka ofruar për shitje në muajin prill të vitit 2025.
Shit-blerja është kryer nëpërmjet një kompanie amerikane, zbulon kështu një dokument nga Komisioni i Letrave me Vlerë dhe Bursave i Shteteve të Bashkuara (SEC).
Në të thuhet se në fletëobligacione kanë investuar tre investitorë. Identiteti i tyre në dokument nuk është i disponueshëm publikisht, pra nuk thuhet nëse bëhet fjalë për persona juridikë apo fizikë.
Por, IRL zbuloi se cilët janë dy investitorët në kredi. Pjesa tjetër e ofertës ishte e destinuar për blerës jo amerikanë.
Konfirmuam se fondi amerikan i investimeve GMO Trust, nëpërmjet fondit të tij të veçantë për tregjet në zhvillim (GMO Emerging Country Debt Fund), është një nga blerësit e një fletëobligacioni me vlerë prej 17,5 milionë euro. Borxhi duhet të shlyhet deri në vitin 2035 dhe ka një normë interesi prej 7,63%.
Zbuluam edhe një investitor tjetër. Në dokumentin e Komisionit të Letrave me Vlerë të SHBA-ve nga vjeshta e vitit 2025 thuhet se fondi amerikan i investimeve SEI Institutional Investments Trust në listën e tij të investimeve në vendet në zhvillim e liston fondin e Luksemburgut Delphos Securities SARL.
Edhe ky borxh duhet të shlyhet deri në vitin 2035, ndërsa norma vjetore e interesit është 7,625%, pothuajse e njëjtë me normën e interesit të kredisë të marrë nga GMO Emerging Country Debt Fund.
Por, ajo që e vumë re më pas ishte edhe më interesante.
SEI Institutional Investments Trust është pjesë e familjes së fondeve SEI Investments Company.
IRL zbuloi se SEI Investments Company e kryen kontabilitetin për gjashtë fondet private të Jared Kushner-it, Affinity Partners, i cili punon nën emrin e tij ligjor të regjistruar A Fin Management LLC.
Më konkretisht, në një dokument të dorëzuar nga A Fin Management LLC në SEC më 22 mars të vitit 2026, SEI Investments Company është shënuar si administrator i jashtëm – kompani përgjegjëse për kontabilitet dhe menaxhim administrativ të gjashtë fondeve të tyre.
Sipas dokumentit tre nga gjashtë fondet janë të regjistruara në Ishujt Kajmane.
Siguruam edhe një vërtetim të dytë se SEI Investments Company e kryen këtë funksion për kompaninë e Kushner-it në një raport në platformën kërkimore newstracks.com, ku përpunohet financimi i kompanisë së tij nga Fondi Publik i Investimeve të Arabisë Saudite (Public Investment Fund – PIF).
IRL dërgoi pyetje në adresën elektronike te Affinity Partners dhe SEI Investments Company për të kërkuar konfirmim dhe detaje të tjera për këto informacione, si dhe pyetje në lidhje me linjën kreditore. Por, përgjigje nuk morëm.
Përndryshe, siç raportoi gazeta amerikane “The New York Times” projekti turistik i Kushner-it në Shqipëri ka fituar partnerë nga Katari. Bëhet fjalë për kompaninë Khayyat, pjesë e grupit të biznesit të Katarit UCC Holding me seli në Doha.
Pronarë të saj janë vëllezërit Al-Hayat, Ramez dhe Mohammed. Përveç se iu bashkuan Kushner-it në projektin e Sazanit, ata blenë edhe parcela private të tokës në bregdet, pranë lagunës Vjosë-Nartë, mu përballë Sazanit.
Dy projektet turistike janë të lidhura strukturisht me Kushner-in përmes një arkitekture të përbashkët korporative.
Problemet pronësore dhe ligjore që lindën për shkak të blerjes së parcelave të lagunës më pas nxitën Revolucionin Flamingo në Tiranë, i cili po vazhdon ende.
Dokumentet e përdorura gjatë hulumtimit i gjeni KËTU.