Zëvendëskryeministri dhe ministri i Transportit, Aleksandar Nikolloski, njoftoi sot se së bashku me Bashkimin Evropian po punohet intensivisht në përgatitjen e dokumentacionit për ndërtimin e linjës hekurudhore që do të lidhë Shkupin me Tetovën dhe Gostivarin, transmeton Portalb.mk.
Duke folur për mediat në Tetovë, Nikolloski tha se bëhet fjalë për një projekt që është pjesë e Planit të Rritjes së Bashkimit Evropian. Sipas tij, lidhja e kryeqytetit me Tetovën dhe Gostivarin është faza e parë e projektit. Në fazën e dytë hekurudha pritet të vazhdojë deri në Kërçovë, ndërsa në fazën e tretë të lidhet me Ohrin, Strugën dhe më pas me Shqipërinë.
Sipas ministrit, ideja për trenat ndërqytetës synon të lehtësojë trafikun rrugor, të zvogëlojë kolonat dhe ndotjen e ajrit. Ai shprehu shpresën që hapat e parë konkretë të ndërmerren vitin e ardhshëm, ndërsa projekti të përfundojë brenda disa viteve.
“Ideja ime dhe një lloj ëndrre është të krijojmë trena ndërqytetës, të cilët do ta lehtësojnë ndjeshëm trafikun, do të ulin kolonat dhe ndotjen. Po punohet intensivisht në këtë projekt dhe shpresoj që vitin e ardhshëm të shohim hapat e parë konkretë, ndërsa pas disa vitesh të mund të udhëtohet nga qendra e Tetovës në qendrën e Shkupit për vetëm gjysmë ore, me një udhëtim të rehatshëm”, deklaroi Nikolloski.
Ai shtoi se këto aktivitete do të jenë vazhdim i projektit “Treni Urban”, i cili po zbatohet në Shkup.
Lidhur me ndërtimin e autostradës Tetovë–Gostivar, ministri tha se kilometrat e parë të përfunduar pritet të jenë gati vitin e ardhshëm, ndërsa nëse punimet vazhdojnë me ritmin aktual, e gjithë autostrada duhet të përfundojë deri në fund të vitit 2028.
Sipas Nikolloskit, janë zgjidhur të gjitha çështjet që lidhen me shpronësimin e tokës, ndërsa aktualisht po punohet për zhvendosjen e linjave të rrjetit energjetik.
“Ndërtimi i autostradës Tetovë–Gostivar po ecën mirë. Ky është një projekt që e nisi kjo Qeveri. Janë zgjidhur të gjitha çështjet e shpronësimit, ndërsa tani po zgjidhen ato që lidhen me zhvendosjen e linjave elektrike. Gjithashtu, nuk duam të izolojmë banorët në njërën apo tjetrën anë të autostradës, prandaj paralelisht po ndërtohen mbikalimet dhe urat. Nëse vazhdojmë me këtë ritëm, vitin e ardhshëm do të shohim kilometrat e parë të përfunduar, ndërsa deri në fund të vitit 2028 autostrada Tetovë–Gostivar do të jetë plotësisht e përfunduar”, tha ai.
Nikolloski i bëri këto deklarata gjatë inspektimit të rrugës së rikonstruktuar “Shtipska” në Tetovë, së bashku me kryetarin e komunës.
Duke iu përgjigjur pyetjeve të gazetarëve për ecurinë e projektit të rrugës Tetovë–Prizren, zëvendëskryeministri tha se puna po vazhdon dhe se aktualisht është në proces projektimi i tunelit, i cili do të jetë më i gjati në vend. Për këtë arsye, Fakulteti i Ndërtimtarisë në Shkup ka kërkuar informacione shtesë.
Nikolloski kujtoi se ky projekt i lidhjes rrugore u dakordua vitin e kaluar ndërmjet qeverive të Maqedonisë së Veriut dhe Kosovës.
“Fakulteti i Ndërtimtarisë e ka përfunduar projektin bazë për pjesën tonë të projektit. Ata kërkuan informacione shtesë lidhur me gjatësinë e tunelit dhe pikën e lidhjes, të cilat po ua dorëzojmë. Duke qenë se bëhet fjalë për tunelin më të gjatë në vend, projektimi është një ndër ndërhyrjet më komplekse inxhinierike. Sapo të përfundojë projektimi, do ta dimë vlerën e saktë të projektit dhe do të fillojmë të sigurojmë mjetet financiare, pas së cilës do të nisin edhe punimet”, deklaroi ministri.
Sipas tij, projekti po përparon mirë, duke pasur parasysh se bëhet fjalë për një nga projektet më të mëdha infrastrukturore, dhe shpreson që pas përfundimit të projektimit nga Fakulteti i Ndërtimtarisë, ai të prezantohet para publikut.
Në shkurt të këtij viti, u njoftua se autostrada Kërçovë-Ohër do të përfundojë me një shumë të re prej 186 milionë eurosh dhe një afat deri në qershor të vitit të ardhshëm. Në mars, drejtori i NPRRSh-së, Koce Trajanovski, nënshkroi aneks të ri, të tetë, të marrëveshjes midis NPRRSh-së dhe Sinohodron kineze, ndërsa paratë janë të destinuara posaçërisht për stabilizimin e rrëshqitjeve të dheut duke ndërtuar 14 galeri. Këto fonde, sipas njoftimit të sotëm, duket se janë siguruar në formën e kredive nga bankat vendase. Autostrada është e gjatë 57 kilometra, nga të cilat deri më tani janë hapur rreth 40 kilometra.
Autostrada ka qenë në ndërtim e sipër për më shumë se 12 vjet, dhe projekti u nis nga ish-kryeministri Nikolla Gruevski, i cili tani është i dënuar me burg dhe gëzon azil në Hungari. Rasti i financimit të autostradës përmes një kredie nga Banka kineze Eksim ishte një nga rastet e Prokurorisë Speciale Publike, i quajtur “Trajektorja”. Ndër të pandehurit, përveç Gruevskit, ishin ish-zëvendëskryeministri Vlladimir Peshevski, ish-ministri i Transportit dhe Lidhjeve Mile Janakieski, si dhe ish-drejtori i NPRRSh-së, Ljupço Georgievski. Akuzat kundër tyre në këtë rast u vjetërsuan pas ndryshimeve në Kodin Penal të miratuara nga qeveria e mëparshme, e udhëhequr nga Lidhja Socialdemokrate e Maqedonisë (LSDM) dhe Bashkimi Demokratik për Integrim (BDI). Akuzat ishin se në këtë rast buxheti i shtetit ishte dëmtuar me 155 milionë euro. Më parë, për vite me radhë, çështja ishte zvarritur nëpër labirintet gjyqësore.
- LEXO: Ndërtimi i rrugës Tetovë-Gostivar-Bukojçan do të zgjatet deri në fund të vitit 2029
- LEXO: Nikolloski: Janë siguruar 175 milionë euro mjete shtesë për përfundimin e autostradës Kërçovë-Ohër
- LEXO: Mickoski: Për autostradën Kërçovë-Ohër nuk po marrim më kredi nga banka kineze Eksim
- LEXO: Autostrada Kërçovë-Ohër përsëri u shtrenjtua, me një aneks të ri prej 803 milionë eurosh