Bashkimi Demokratik për Integrim (BDI) si udhëheqës i koalicionit Fronti Evropian, ka vendosur që tubimi që ishte planifikuar të mbahet më 6 maj në Tetovë, do të mbahet një ditë më herët, transmeton Portalb.mk.
“Tubimi përmbyllës për Zgjedhjet parlamentare i Frontit Europian do të mbahet me 05 Maj, 2024 në “sheshin Iliria” në Tetovë me fillim në ora 20:00”, njoftoi BDI-ja.
Nga kjo parti kanë vlerësuar që ky ndryshim është bërë me qëllim prishjen e planit të Rusisë dhe Putinit për eskalimin e situatës. Ata kanë vlerësuar që Bilall Kasami është një vegël e Rusisë së Putinit që ka për qëllim realizimin e qëllimeve ruse në vend.
Kryetari i Komunës së Tetovës, Bilall Kasami, ka deklaruar që koalicioni Vlen i pari ka paraqitur informacionin në komunë për mbajtjen e tubimit përmbyllës në Tetovë më 6 maj. BDI-ja kishte paralajmëruar tubimin përmbyllës në kohën dhe vendin e njëjtë si koalicioni opozitar VLEN.
Ndryshe, tubimet e planifikuara përmbyllës për një ditë në Tetovë, kanë shkaktuar përplasje në mes Frontit Evropian dhe VLEN-it. Këta të fundit kishin deklaruar se se tubimi i tyre do të mbahet dhe për këtë kanë edhe pëlqimin e dhënë nga ana e Komunës së Tetovës.
Rrethi i dytë i zgjedhjeve presidenciale do të mbahet me 8 maj së bashku me zgjedhjet parlamentare.
- LEXO: Përplasje mes Frontit Evropian dhe VLEN-it për tubimin në të njëjtën ditë në Tetovë
- LEXO: U mbajt rrethi i parë i zgjedhjeve presidenciale në Maqedoninë e Veriut, dy kandidatë do të përballen më 8 maj, gjithçka që ndodhi
- LEXO: Rezultatet e votave të numëruara të rrethit të parë të zgjedhjeve presidenciale në RMV