Akademia Mbretërore Suedeze e Shkencave ka shpallur fituesin e Çmimit Nobel në Fizikë 2026, duke nderuar Francis Halzen, fizikantin belgo-amerikan, profesor në Universitetin e Wisconsin-Madison-it, SHBA, transmeton Poralb.mk.
Sipas faqes zyrtare të Nobelit, Francis Halzen, i lindur më 23 mars 1944 në Tienen të Belgjikës, u vlerësua me çmimin “për kontributet vendimtare në Observatorin e Neutrinove IceCube dhe zbulimin e neutrinove me energji të lartë me origjinë astrofizike”. Ai ndodhej në Universitetin e Wisconsin-Madison-it në kohën e dhënies së çmimit.
Observatori IceCube, i vendosur në Antarktidë, është një nga projektet më të rëndësishme bashkëkohore në kërkimin e grimcave elementare dhe të fenomeneve kozmike.
Zbulimet e realizuara nën drejtimin shkencor të Francis Halzen kanë hapur një dritare të re për studimin e universit, duke u mundësuar shkencëtarëve të hetojnë burimet më energjetike dhe më të largëta të kozmosit përmes neutrinove, grimca pothuajse pa masë që përshkojnë hapësirën me ndërveprim minimal me materien.
Komiteti Nobel theksoi se kërkimet e tij kanë transformuar astronominë e neutrinove në një fushë të re të eksplorimit shkencor, duke sjellë prova të drejtpërdrejta për ekzistencën e neutrinove me origjinë jashtë galaktikës sonë dhe duke zgjeruar njohuritë mbi proceset astrofizike më ekstreme në univers.
Çmimi Nobel në Fizikë 2026 iu dha i vetëm Francis Halzen, duke vlerësuar një karrierë të gjatë shkencore dhe ndikimin e jashtëzakonshëm të punës së tij në fizikën e grimcave dhe astrofizikën moderne.