Organizata Botërore e Shëndetësisë ka thënë se rreziku i një epidemie në Rusi është i ulët pas vdekjes së papritur të një punonjëse laboratori që punonte në një institut kërkimor për murtajën në Siberi, transmeton Euronews.
28-vjeçari, Darya Shipilova vdiq javën e kaluar, dy ditë pasi u sëmur. Raportet e mediave ruse sugjeruan se ajo mund të jetë infektuar pas një aksidenti në vendin e saj të punës, ku mbahen dhe studiohen patogjenë të rrezikshëm.
Autoritetet ruse e kanë minimizuar incidentin dhe thonë se Shipilova vdiq nga “pneumonia me etiologji të panjohur” . Masa të rrepta karantine janë vendosur në qendrën kërkimore në qytetin e Irkutskut dhe në disa spitale fqinje.
Christian Lindmeier, një zëdhënës i OBSH-së, tha të martën se nuk kishte shenja të një shpërthimi më të gjerë.
“Të gjitha kontaktet e pacientëve thuhet se janë identifikuar dhe po monitorohen për sëmundje, dhe asnjë deri më sot nuk ka shfaqur simptoma të sëmundjes”, tha ai.
Zyrtarët rusë po hetonin ende nëse murtaja virale pneumonike shkaktoi vdekjen e Shipilovas, por OBSH-ja e kishte vlerësuar rrezikun shëndetësor si “të moderuar deri të ulët” për Irkutskun, “të ulët” për pjesën tjetër të Rusisë dhe “shumë të ulët” për Evropën.
60 kolegë të Shipilovas kanë qenë të mbyllur në institutin ku ajo punonte që nga e premtja, duke fjetur në dysheme dhe karrige ndërsa kryhen testet. Masa të ngjashme janë vendosur në pesë spitale, me të afërmit që janë ndaluar të vizitojnë pacientët.