Kryeministri Hristijan Mickoski ka përsëritur edhe një herë qëndrimin e tij për zgjedhjet e parakohshme parlamentare, duke lënë të kuptohet se pushteti është i gatshëm për një përballje të re elektorale nëse këtë e kërkon opozita. Pa dhënë edhe kësaj here një afat konkret, Mickoski deklaroi se nëse opozita kërkon zgjedhje të parakohshme, qeveria do t’i përgjigjet pozitivisht dhe, sipas tij, koalicioni qeverisës do të dalë sërish fitues, transmeton Portalb.mk.
“Ne si koalicion kemi marrë legjitimitet nga qytetarët për të qenë qeveri për katër vjet. Por, nëse opozita mendon se nevojiten zgjedhje të parakohshme, natyrisht se ne nuk do të sillemi si frikacakë dhe të qëndrojmë anash, por do t’i përgjigjemi pozitivisht kësaj kërkese dhe natyrisht, do t’i fitojmë“, tha Mickoski.
Pas kësaj deklarate, erdhën edhe reagime të menjëhershme nga opozita.
Kreu i LSDM-së Venko Filipçe tha se LSDM është gati për zgjedhje kurdo që ato të shpallen, me ekip, program dhe Plan të ri për vendin ,dhe se siç thotë ai nuk do të jenë alibi për Mickoskin për zgjedhje.
“Jo, nuk do të jemi alibi. Do të ketë zgjedhje kur të mbarojnë paratë për tendera të korruptuar. Kjo është ajo që u intereson atyre, asgjë tjetër. Ne jemi sigurisht gati, po përgatitemi çdo ditë. Nëse më pyetni nëse jemi gati, jemi gati me një ekip, jemi gati me një program të mirë”, tha Filipçe.