Dua Lipa, Rita Ora, Bebe Rexha, The Weekend, Coldplay, Lana del Rey, Tuna, Bardhi, janë vetëm disa nga emrat të cilët të rinjtë duan t’i shohin vitin e ardhshëm në Sunny Hill Festival në Prishtinë. Portalb.mk i pyeti pjesëmarrësit e këtij viti se kë duan të shohin ata vitin e ardhshëm në skenat e festivalit.
Cilin nga emrat ndërkombëtarë e duan të rinjtë për vitin e ardhshëm, ndiqeni videon më poshtë për të parë se çfarë thanë ata.
I pyetëm edhe cilin këngëtar nga Maqedonia e Veriut duan ta shohin në festival vitin e ardhshëm, përgjigjet i gjeni në videon në vijim.
Sunny Hill Festival e përmbylli edicionin e shtatë në Prishtinë ku për tre ditë e net performuan emra të mëdhenj të skenës ndërkombëtare dhe vendase dhe ku morën pjesë mijëra të rinj nga vendi, rajoni dhe bota.
Festivali, i cili u mbajt për tri ditë, nga 31 korriku deri më 2 gusht, ofroi performanca në katër skena, duke krijuar një program të larmishëm që ndërthuri pop-in, elektronikën, hip-hopin dhe zhanre të tjera muzikore.
Në mesin e emrave kryesorë ndërkombëtarë të këtij edicioni ishte Katy Perry, e cila performoi në natën e parë të festivalit. Krahas saj, publiku pati mundësinë të ndiqte edhe performancat e artistëve të njohur nga Kosova dhe më gjerë, mes tyre Dhurata Dora dhe të tjerë.
Nata e dytë solli në skenë Lewis Capaldi, ndërsa performuan edhe këngëtarë të njohur të skenës shqiptare, përfshirë Lumi B, Ledri Vula, MC Kresha dhe Lyrical Son.
Festivali u përmbyll me Martin Garrix dhe dyshen Adam Port & Rampa ndër emrat kryesorë të programit.
Sunny Hill Festival është festivali më i madh muzikor në Kosovë dhe një nga festivalet kryesore të muzikës në Evropën Juglindore.
Në edicionet e kaluara kanë performuar artistë si Dua Lipa, Miley Cyrus, Calvin Harris, Shawn Mendes, J Balvin, Anyma, Stormzy, Peggy Gou, Mochakk, Black Coffee, Burna Boy, Fatboy Slim, Martin Garrix, Hardwell dhe shumë të tjerë.
I themeluar nga familja Lipa në vitin 2018, festivali është përzgjedhur tri herë në listën e 10 festivaleve më të mira evropiane të kategorisë së mesme, ndërsa promovohet ndërkombëtarisht nga fituesja e trefishtë e çmimit Grammy, Dua Lipa.