“Pas viteve në një funksion drejtues, mendoj se njeriu duhet të thotë – mjaft është, dhe t’u lërë hapësirë prokurorëve të tjerë. Do të kthehem në Prokurorinë e Lartë Publike në Gostivar”, tha Abazi në brifingun e sotëm me gazetarët.
Më 28 tetor të këtij viti, prokurorët publikë nga të gjitha prokuroritë në vend do të votojnë në zgjedhje të drejtpërdrejta për drejtuesin e ri të PTHP NKOK.
Ligji aktual për Prokurorinë Publike parashikon mundësinë e rizgjedhjes, ndërsa projektligji i ri, i cili është bllokuar në Kuvend, parashikon mandat gjashtëvjeçar për drejtuesin e PTHP NKOK, pa të drejtë rizgjedhjeje.
Zgjedhja e Islam Abazit në vitin 2022 u shoqërua me polemika, veçanërisht pasi u publikuan fotografi të tij me figura të larta të BDI-së dhe me vëllain e Ali Ahmetit.
Nga Ambasada e SHBA-së në atë kohë deklaruan se ishin të befasuar nga zgjedhja e Abazit, veçanërisht duke pasur parasysh milionat e dollarëve të shpenzuara për trajnime dhe ngritjen e kapaciteteve të sistemit gjyqësor në vend.