Prokuroria Themelore Publike Manastir, në bazë të procedurës paraprake të zhvilluar dhe provave të siguruara, ka ngritur propozimakuzë kundër pesë mjekëve-internistë nga Spitali Klinik i Manastirit “Dr. Trifun Panovski” për kryerjen e veprës penale – Vepra të rënda kundër shëndetit të njerëzve, transmeton Portalb.mk.
Ata akuzohen se në periudhën nga 28.05.2024 deri më 04.06.2024, në Repartin e Mjekësisë Interne të spitalit, kanë trajtuar në mënyrë të pandërgjegjshme një paciente 40-vjeçare, duke shkaktuar përkeqësim të gjendjes së saj shëndetësore, i cili ka rezultuar me vdekje.
Pacientja ishte paraqitur në spital pas një kontrolli dhe udhëzimi paraprak nga mjeku amë, i cili kishte shprehur dyshimin për inflamacion të venave – tromboflebit. Por, pas kontrollit fillestar në Repartin e Mjekësisë Interne, pa anamnezë të plotë dhe analiza të detajuara, asaj i ishte vendosur diagnoza – artrit reumatoid dhe i ishte dhënë terapi, pas së cilës ishte lëshuar në shtëpi.
Si rezultat i kësaj, nuk ishte përcaktuar me kohë gjendja e vërtetë shëndetësore e pacientes, përkatësisht nuk ishte zbuluar dhe diagnostikuar tromboza, dhe as nuk ishte ndërmarrë me kohë terapia dhe trajtimi përkatës për këtë gjendje. Me këtë ishte humbur një mundësi reale për zbulimin dhe trajtimin në kohë të procesit trombotik te pacientja, për parandalimin ose kufizimin e përparimit të këtij procesi, si dhe të përkeqësimit pasues të gjendjes së saj shëndetësore.
Më 01.06.2024, pacientja me dhimbje të forta në bark dhe gjendje të përkeqësuar të përgjithshme u paraqit sërish për kontroll në spital. Edhe pse atëherë ishte shtruar në spital, gjatë katër ditëve në vijim, pavarësisht vlerave jonormale të analizave laboratorike dhe biokimike, asnjëri nga mjekët kujdestarë nuk ndërmori ekzaminime shtesë diagnostikuese me qëllim të shqyrtimit të shkaqeve dhe përcaktimit të terapisë përkatëse.
Për këtë arsye, gjendja shëndetësore e pacientes vazhdoi të përkeqësohej ndjeshëm. Pasditen e 04.06.2024, ajo kërkoi ndihmë mjekësore në një klinikë private në Shkup, ku u pranua në gjendje të rëndë të përgjithshme. Gjatë ndërhyrjes së menjëhershme kirurgjikale, u konstatua trombozë e arteries mezenterike të sipërme dhe të poshtme, me gangrenë të plotë të zorrës së hollë dhe të trashë. Gjendja tashmë ishte e paoperueshme dhe më 05.06.2024 pacientja ndërroi jetë.