Navigacioni i Maqedonisë po punon për heqjen e defektit në një nga radarët në Aeroportin Ndërkombëtar të Shkupit, informon Navigacioni pasi disa media raportuan dje se radari i vetëm funksional në kontrollin e trafikut ajror M-NAV është prishur. Prandaj, në një deklaratë për MIA-n, ata thonë se për momentin kjo rrethanë nuk ka asnjë ndikim në sigurinë e funksionimit të trafikut ajror, transmeton Portalb.mk.
“Është bërë kontakt i drejtpërdrejtë me prodhuesin dhe është lejuar qasje online në pajisje me qëllim kryerjen e diagnostikimit dhe dhënien e sugjerimeve dhe mbështetjes për zgjidhjen e problemit. M-NAV gjithashtu po angazhon urgjentisht ekspertët e saj me qëllim që sa më shpejt të jetë e mundur të kthehet në përdorim koka e radarit Alenia – Banjski Rid”, tha Vladimir Risteski, kryetar i Bordit të Drejtorëve të M-NAV dhe drejtor Ekzekutiv i Sektorit të Navigacionit Ajror, në një deklaratë për MIA-n.
Ai shton se M-NAV ka tre koka radari – një pranë aeroportit të Ohrit dhe dy në aeroportin e Shkupit.
Risteski thotë se një defekt teknik me natyrë elektronike, siç është ai i njërës prej kokave të radarit në Aeroportin e Shkupit, është një dukuri normale në aviacion, dhe kur ato ndodhin, parashikohen procedura sigurie në punë në mënyrë që të vazhdohet ofrimi i shërbimeve për linjat ajrore në rrethana të tilla.
“M-NAV zbaton pikërisht ato procedura dhe aktualisht nuk ka ndikim në siguri në funksionimin e trafikut ajror në Aeroportin e Shkupit. I vetmi ndryshim është rregullimi i numrit të avionëve që mund të shërbehen në orë. Këto rregullore do të mbeten në fuqi derisa të eliminohet defekti”, shton ai.
Disa media raportuan dje se një radar i M-NAV në Aeroportin e Shkupit ishte i prishur, dhe drejtori i M-NAV, Vladimir Risteski, tregoi se puna është duke vazhduar, por me një ritëm më të ngadaltë.