Shpikjet e NASA-s nuk kanë mbetur vetëm në hapësirë. Teknologji të zhvilluara fillimisht për të përballuar sfidat e misioneve hapësinore janë përshtatur më vonë për përdorim të përditshëm, nga syzet dhe ushqimet e paketuara deri te kamerat e telefonave, transmeton RTSH.
Që prej themelimit në vitin 1958, NASA ka zhvilluar teknologji për nevojat e eksplorimit hapësinor. Një pjesë e tyre janë licencuar për kompani private dhe janë kthyer në produkte të përdorura gjerësisht.
Lentet rezistente ndaj gërvishtjeve janë një prej këtyre teknologjive. Në vitet ’70, NASA zhvilloi një shtresë të hollë plastike për pajisjet hapësinore, e cila më pas u përshtat për të mbrojtur lentet plastike të syzeve nga gërvishtjet.
Veshjet kundër mjegullimit u zhvilluan për të parandaluar krijimin e avullit në sipërfaqet e përdorura në anijet kozmike. Më vonë, kjo teknologji u aplikua në syze, pajisje sportive dhe xhama automjetesh.
Një tjetër fushë ku teknologjia hapësinore ka ndikuar është mjekësia. Zhvillimet në sensorët e zërit dhe dridhjeve kontribuuan në teknologjinë e hershme të implanteve kokleare, të cilat përdorin impulse elektrike për të stimuluar dëgjimin.
NASA dhe kompania Pillsbury zhvilluan gjithashtu një sistem të ri për kontrollin e sigurisë së ushqimeve të paketuara për misionet hapësinore. Parimet e këtij sistemi u përdorën më vonë gjerësisht në industrinë ushqimore.
Edhe kamerat e telefonave kanë një lidhje me teknologjinë e zhvilluar për hapësirën. Në vitet ’90, studiuesit zhvilluan sensorë imazhi CMOS shumë të vegjël dhe me cilësi të lartë, duke mundësuar përdorimin e tyre në pajisje kompakte.
Ndërkohë, teknologjitë e materialeve të zhvilluara për t’i bërë pajisjet më rezistente ndaj temperaturave ekstreme dhe korrozionit janë përshtatur për përdorime në industri të ndryshme.
Edhe kufjet pa tela lidhen me nevojat e astronautëve për komunikim pa duar gjatë misioneve. Teknologjia u zhvillua për t’u mundësuar astronautëve të komunikonin pa pengesat e kabllove.