Shfaqja “Zotëriu i parë” e Teatrit Shqiptar të Shkupit fitoi çmimin “Sulejman Pitarka” për shfaqjen më të mirë në edicionin e 25-të të Festivalit “Teatri Shqiptar në Maqedoni”, që përfundoi të martën në Dibër, shkruan Portalb.mk.
Mbrëmja përmbyllëse solli premierën e monodramës “Psikoza 4.48”, me motive nga Sarah Kane dhe regji të Besfort Idrizit. Pas shfaqjes, në sallën e mbushur të Qendrës për Kulturë në Dibër, u mbajt ceremonia e ndarjes së çmimeve.
Shfaqjet u vlerësuan nga juria profesionale e përbërë nga Ismet Ramadani, Lesh Nikolla dhe Faik Gashi. Festivali u realizua me mbështetjen e Ministrisë së Kulturës dhe Turizmit, Komunës së Dibrës dhe përkrahësve të tjerë.
Teatri Shqiptar i Shkupit mori edhe dy çmime për interpretimin. Visar Etemi u shpall aktori më i mirë dhe u nderua me çmimin “Qemal Ajdini”, ndërsa Abedin Alimi fitoi çmimin për aktorin më të mirë në rol dytësor.
Çmimi “Qemal Ajdini” për aktoren më të mirë iu nda Yllka Nuredinit për monodramën “Psikoza 4.48”, por aktorja e refuzoi atë.
Teatri i Tetovës u vlerësua me tri çmime për shfaqjen “Shtëpia pa dritare”. Saimir Gongo fitoi çmimin për regjinë më të mirë, ndërsa Merita Limani Mustafa dhe Sheqerije Ilazi u nderuan për interpretimin në role dytësore.
Çmimi për skenografinë më të mirë i takoi Valentin Svetozarevit për shfaqjen “Duke pritur Godonë” të Teatrit të Kumanovës, ndërsa Drini Shehu fitoi çmimin për kostumografinë e shfaqjes “Plaçka” të Teatrit “Petro Marko” të Vlorës.