Festivali Ndërkombëtar i Teatrove, Prishtina International Theater Festival “Burbuqe Berisha” (PITF), ka hapur thirrjen për aplikime për edicionin e ardhshëm, i cili do të mbahet nga 18 deri më 23 maj 2026 në Prishtinë. Këtë vit, festivali shënon një moment të veçantë, pasi vjen me edicionin jubilar të 10-të, një përvjetor i rëndësishëm që simbolizon një dekadë promovimi të artit skenik dhe të bashkëpunimit ndërkombëtar në teatër, shkruan Portalb.mk.
Festivali organizohet nga Teatri AAB “Faruk Begolli” dhe fton teatrot profesionale, kompanitë teatrore, kompanitë e pavarura dhe format e tjera të prodhimeve teatrore që të aplikojnë për pjesëmarrje në programin e festivalit.
PITF ka karakter garues, ku shfaqjet do të vlerësohen nga një juri profesionale, si dhe nga dy juri të veçanta: juri e studentëve dhe juri e medias. Në kuadër të festivalit do të ndahen disa çmime kryesore, përfshirë Çmimin për aktorin ose aktoren më të mirë dhe Çmimin për shfaqjen më të mirë, ndërsa festivali nuk vendos kufizime për zhanrin e shfaqjeve, bëjnë të ditur nga faqja zyrtare e festivalit.
Qëllimi i festivalit është të prezantojë projekte teatrore me cilësi të lartë nga e gjithë bota, si dhe të krijojë një hapësirë për shkëmbim idesh, përvojash dhe bashkëpunimesh të reja ndërkombëtare mes artistëve dhe institucioneve kulturore.
Të gjitha palët e interesuara mund të aplikojnë deri më 30 prill 2026 përmes formularit online:
Forma e aplikimit:
https://apply-pitf.teatriaab.com/
Për informata shtesë mund të kontaktohet në: pitf@aab-edu.net.
Në edicionin jubilar të dhjetë, PITF synon të vazhdojë traditën e prezantimit në Prishtinë të produksioneve teatrore nga vende të ndryshme të botës, duke e kthyer qytetin për disa ditë në një pikëtakim të rëndësishëm të dialogut artistik dhe kulturor.