Presidenti i Bullgarisë Rumen Radev në takimin e punës me kryeministrin grek Kyriakos Mitsotakis në Athinë, ka diskutuar për intensifikimin e menjëhershëm të punës për planet strategjike bilaterale, por edhe për problemet me Republikën e Maqedonisë së Veriut pas ardhjes së qeverisë së re, transmeton Portalb.mk.
“Për fat të keq, lidershipi shtetëror i Maqedonisë së Veriut është e qartë se nuk është gati për këtë pozicion. Është e nevojshme të njihet e drejta ndërkombëtare. Pasi të nënshkruhet një marrëveshje ndërkombëtare, ajo duhet të zbatohet nga të gjitha qeveritë e mëvonshme, jo të rishikohet”, tha Radev.
Ai më tej shtoi se 120.000 maqedonas kanë nënshtetësi bullgare.
“Njohja e statistikave është gjithashtu e nevojshme, sepse tani 120.000 maqedonas kanë nënshtetësi bullgare, me origjinë të dokumentuar bullgare”, tha Radev.
Lidhur me këto deklarata ka reaguar kryeministri Hristijan Mickoski.
“Jam mësuar me nënçmime dhe ofendime, por kam menduar se sjellje të tilla kemi lënë në mesjetë”, tha kryeministri Hristijan Mickoski, duke komentuar deklaratën e presidentit bullgar Rumen Radev se kryeministri maqedonas nuk ka njohuri për të drejtën ndërkombëtare.
“Dëshiroj që ne si shtete ballkanike të ndjekim shembullin e shteteve të tjera si ato baltike, skandinave, që së bashku me ura të ndërtuara të performojmë në tregjet e treta në mënyrë komplekse dhe të bashkuar para zyrtarëve. në BE, kudo në botë të ndërtojmë politikë të fqinjësisë së mirë. Me nënçmim dhe me sharje nuk është mirë ajo punë. Nëse kanë vendosur të bëjnë kështu, mendoj se këtë sjellje e kemi lënë në mesjetë”, tha Mickoski.
Ai i tha presidentit bullgar Rumen Radev dhe kryeministrit grek Kirjakos Mitsotakis, për të cilët tha se janë më me përvojë se ai dhe kanë qenë në pozitat e tyre për një kohë të gjatë, të rishikojnë deklaratat dhe sjelljet e tyre dhe shtoi se populli maqedonas është paqësor dhe i gatshëm për bisedë dhe bashkëpunim që duhet të jetë nga të dyja palët.
“Më 8 maj përfunduan kohët kur bashkëpunimin me politikanët maqedonas e shihnin si rrugë njëkahëshe. Na vjen keq që po shohin një ndryshim në politikë këtu. Ka ikur koha kur në qeverinë maqedonase kishte politikanë me shtyllë të lakuar, politikanë që poshtërohen, të cilët janë të gatshëm të nënshkruajnë çdo gjë, përveçse të mbrojnë interesat e qytetarëve maqedonas. Nga ana tjetër, teksa po e bëjnë këtë, valëvitin flamurin evropian dhe njëkohësisht grabisin shtetin dhe qytetarët. Ata duhet të mësohen me politikanët që janë këtu për të mbrojtur interesat e qytetarëve, për të punuar për të mirën e atdheut, për të ardhmen dhe ne jemi të gatshëm të ndërtojmë marrëdhënie të mira fqinjësore me të gjithë”, shtoi kryeministri.
Ndërkohë Radev shpjegoi në një konferencë për shtyp se një projekt i rëndësishëm strategjik për Greqinë dhe Shqipërinë është terminali i gazit të lëngshëm natyror në Aleksandropoli, i cili duhet të vihet në funksion më së voni deri në tetor.
“Terminali ka ende probleme teknike, të cilat janë duke u zgjidhur. Bullgaria merr pjesë në projekt, e cila ka marrë 20 përqind të tij”, kujtoi Radev.
Kujtojmë se në vitin 2020, ministrja e atëhershme bullgare e drejtësisë Desislava Ahladova, deklaroi se pothuajse 66.000 maqedonas gjatë 10 viteve të fundit, kanë marrë nënshtetësi bullgare. Në të gjitha rastet, baza për dhënien e shtetësisë është dëshmia për prejardhjen bullgare, tha ministrja e Drejtësisë.
“Në të gjitha rastet, baza për dhënien e shtetësisë është dëshmia e prejardhjes bullgare”, citohet të ketë thënë ministrja Ahladova.
Nga 1 janari 2010 deri më 22 tetor 2020, kërkesë për shtetësi bullgare kanë paraqitur 77.829 shtetas maqedonas, prej tyre 77.726 ishin me origjinë bullgare. Gjatë së njëjtës periudhë, 65.675 maqedonas morën shtetësinë bullgare me dekret presidencial.
Në shtator të vitit 2023 u raportua se Parlamenti bullgar së shpejti do të shqyrtojë leximin e dytë të projektligjit për shtetësinë bullgare, i cili nëse miratohet pas leximit të tretë, do të lejojë që të gjithë mbajtësit e pasaportave dhe shtetësisë bullgare të bëhen publike. Kjo do të thotë se të gjithë qytetarët e Maqedonisë së Veriut ose personat që punojnë jashtë vendit me pasaportë bullgare do të shpallen publikisht në regjistrin e qytetarëve, i cili sipas projektligjit duhet të jetë publik. Megjithatë nuk ka informacion shtesë nëse është miratuar ky projektligj.
Ndryshe, me fitoren e VMRO-së, përkatësisht formimin e qeverisë së re, ka filluar edhe acarimi i raporteve midis Maqedonisë së Veriut me Bullgarinë dhe Greqinë. Me Bullgarinë, për shkak se kryeministri Mickoski tha mund të ketë ndryshim të Kornizës negociuese, e cila u kritikua ashpër nga Sofja. Ndërsa tensionet me Greqinë nisën kur presidentja Gordana Siljanovska Davkova, gjatë betimit nuk përmendi emrin kushtetues të vendit, Maqedoni e Veriut, por e përmendi emrin e dikurshëm, Maqedoni.