Qeveria e Kosovës në vendimin për themelimin e grupit punues për strategji shtetërore për procedurat e Apelit të ish-krerëve të UÇK-së, Hashim Thaçi, Jakup Krasniqi, Kadri Veseli e Rexhep Selimi, ka përcaktuar detyrat e grupit si dhe përbërjen e plotë të tij, shkruan Koha.net.
Në vendimin e mitaruar në mbledhjen e Qeverisë të mbajtur të mërkuren, thuhet se grupi punues do të merret me hartimin dhe harmonizimin e Strategjisë shtetërore lidhur me procedurat e Apelit para Dhomave të Specializuara në Hagë, si dhe me bashkërendimin e veprimeve institucionale dhe diplomatike për dokumentimin, mbrojtjen dhe afirmimin e së vërtetës historike të luftës çlirimtare të Kosovës.
Grupi punues, në ushtrimin e mandatit të tij, thuhet se merr parasysh Deklaratën e Kuvendit të Republikës së Kosovës, të datës 28 shtator 2026, me synim bashkërendimin e qëndrimeve dhe veprimeve institucionale, në përputhje me kompetencat kushtetuese dhe ligjore të institucioneve përkatëse.
Kryesues i grupit do të jetë zëvendëskryeministri i parë, njëherësh ministër i Punëve të Jashtme, Glauk Konjufca.
Në përbërje grupi do të ketë edhe një përfaqësues nga Zyra e Kryeministrit, një përfaqësues nga Ministria e Drejtësisë, një përfaqësues nga Ministria për Punë, Familje dhe Vlera të Luftës Çlirimtare, një përfaqësues nga Zyra e Presidentes, një përfaqësues nga Kryesia e Kuvendit, një përfaqësues nga Grupi Parlamentar i Lëvizjes Vetëvendosje, një përfaqësues nga Grupi Parlamentar i Partisë Demokratike të Kosovës, një përfaqësues nga Grupi Parlamentar i Lidhjes Demokratike të Kosovës, një përfaqësues nga Grupi Parlamentar i Aleancës, si dhe një përfaqësues nga grupet parlamentare të komuniteteve joshumicë.
Sipas vendimit detyrat dhe përgjegjësitë e grupit punues janë:
1. Ta hartojë propozimin për Strategjinë Shtetërore lidhur me procedurat e Apelit para Dhomave të Specializuara në Hagë
2. T’i identifikojë çështjet kryesore politike, juridike, institucionale dhe diplomatike që kërkojnë bashkërendim në nivel shtetëror;
3. Ta sigurojë bashkëpunimin ndërmjet institucioneve të Republikës së Kosovës dhe përfaqësuesve të subjekteve parlamentare;
4. Të shqyrtojë dhe të propozojë masa për mbështetjen institucionale, juridike dhe diplomatike, në përputhje me kompetencat ligjore të institucioneve përkatëse;
5. Të bashkëpunojë me ekipet mbrojtëse për identifikimin e nevojave për dokumentacion, ekspertizë profesionale dhe mbështetje institucionale, duke respektuar pavarësinë dhe konfidencialitetin e tyre;
6. T’i identifikojë nevojat për ekspertizë profesionale dhe përfshirjen e ekspertëve vendorë e ndërkombëtarë;
7. Të propozojë mekanizma të përshtatshëm për komunikim dhe ndërveprim ndërinstitucional, duke respektuar pavarësinë e organeve të drejtësisë, të mbrojtjes dhe integritetin e procedurave gjyqësore;
8. T’i shqyrtojë mundësitë juridike dhe institucionale për adresimin e çështjeve që lidhen me respektimin e të drejtave themelore, standardeve të gjykimit të drejtë dhe garancive procedurale;
9. Ta identifikojë, ta sistemojë dhe ta analizojë dokumentacionin historik, juridik dhe gjyqësor relevant, përfshirë aktgjykimet e Tribunalit Ndërkombëtar Penal për ish-Jugosllavinë, lidhur me krimet e kryera në Kosovë nga Serbia, gjatë viteve 1998-1999, me qëllim mbështetjen e dokumentimit dhe afirmimit të së vërtetës historike dhe, sipas nevojës, vënien e materialeve relevante në dispozicion të ekipeve mbrojtëse;
10. Të hartojë rekomandime për një qasje të bashkërenduar diplomatike dhe të komunikimit ndërkombëtar, me qëllim afirmimin e karakterit çlirimtar të luftës së popullit tonë, dokumentimin e krimeve të regjimit të Serbisë dhe promovimin e respektimit të standardeve ndërkombëtare të drejtësisë dhe të drejtave të njeriut.
Grupi punues, brenda 30 ditëve nga konstituimi, harton propozimin fillestar të Strategjisë Shtetërore dhe planin e veprimit, duke përcaktuar masat prioritare, institucionet përgjegjëse dhe afatet e zbatimit.
Grupi punues sipas vendimit obligohet ta informojë kryeministrin e Kosovës për punën dhe aktivitetet e tij, së paku një herë në muaj.
Për çështje të veçanta, është përcaktuar që grupi punues mund të ftojë ekspertë, përfaqësues institucionalë ose profesionistë përkatës.
Sipas vendimit anëtarët e grupit punues janë të obliguar ta ruajnë konfidencialitetin e informacionit që klasifikohet ose mbrohet me lig.
Mandati i grupit punues është 6 muaj, me mundësi vazhdimi me vendim të Qeverisë.
Më 16 shtator, shkalla e parë e Speciales i dënoi nën akuzat për krime lufte Hashim Thaçin e Jakup Krasniqin me nga 25 vjet burgim, Kadri Veselin me 18 e Rexhep Selimin me 13 vjet burgim.