Lidhja Social Demokratike e Maqedonisë (LSDM) në opozitë ka kritikuar ndryshimet në kabinetin qeveritar të shpallura mbrëmë nga kryeministri Hristijan Mickoski, duke e vlerësuar rindërtimin e Qeverisë si teatër pa rezultate dhe reformë thelbësore. Sipas Social Demokratëve, kryeministri Mickoski e paraqiti kabinetin e vjetër, vetëm me karrige të reja, për të krijuar përshtypjen se diçka po ndryshon, transmeton Portalb.mk.
“Kjo nuk është reformë e Qeverisë, por ndryshim kozmetik i së njëjtës strukturë kriminale. Disa ministra po zhvendosen, disa emra të rinj po dalin në skenë, dhe njerëzit dhe dikasteret kryesore mbeten të njëjta. Punët e brendshme, mbrojtja, financat, punët e jashtme, arsimi – gjithçka në të njëjtat duar. Ata thjesht po ndërrojnë karriget për të krijuar përshtypjen se diçka po ndryshon”, thuhet në deklaratën e LSDM-së.
Duke ndjekur të njëjtin kontekst, partia opozitare deklaron se kjo është një taktikë e Mickoskit për të shkëputur vëmendjen nga problemet në vend. Ata shtojnë se ndërkohë, nuk është bërë asnjë reformë serioze, se nuk është zgjidhur asnjë problem i madh që i shqetëson qytetarët, por vetëm po rishpërndahen postet ministrore midis të njëjtëve njerëz dhe, siç thotë partia, satelitëve të tyre.
“Mickoski vetëm po e rilyen të njëjtin sistem kriminal, në mënyrë që ta mbajë atë në pushtet për një kohë më të gjatë. Ky nuk është ndryshim. Ky është një pranim se qeveria e mëparshme ka dështuar, por në vend që të pranojë përgjegjësinë, po luhet një tjetër teatër”, thotë LSDM.
Partia opozitare përsërit se qytetarët nuk duan emra të vjetër-të rinj në poste të vjetra-të reja, por rezultate që, sipas Social Demokratëve, nuk do të arrihen ndërsa “i njëjti grup i organizuar kriminal” është në krye.
Në fund, LSDM arrin në përfundimin se “shfaqja” me rindërtimin do të jetë jetëshkurtër sepse, siç thonë ata, po përballemi me zgjedhje të parakohshme sepse nuk ka para në thesarin e shtetit.
Per partinë në pushtet, VMRO-DPMNE, riorganizimi i qeverisë konfirmon angazhimin për qeverisje të përgjegjshme, efikase dhe llogaridhënëse të shtetit, duke vlerësuar se ndryshimet janë rezultat i analizës së rezultateve të deritanishme dhe pritjeve të qytetarëve për reforma më të shpejta dhe institucione më efikase.
VMRO-DPMNE thotë se prioritetet e qeverisë mbeten përmirësimi i standardit të jetesës, zhvillimi ekonomik, sundimi i ligjit, lufta kundër korrupsionit dhe forcimi i institucioneve.
“Qeveria e re do të vazhdojë të zbatojë projektet e nisura dhe proceset reformuese me një ritëm të përshpejtuar, me fokus në rezultate konkrete, llogaridhënie dhe përmbushje të premtimeve”, thuhet në deklaratën e partisë.
Sipas partisë, qeveria do të punojë për të përmbushur pritjet e qytetarëve përmes qeverisjes së përgjegjshme, rezultateve konkrete dhe politikave që synojnë një standard më të mirë jetese, stabilitet dhe një të ardhme të sigurt.
Kujtojmë se kryeministri Hristijan Mickoski njoftoi mbrëmë, pas mbledhjes së Komitetit Ekzekutiv (KE) të VMRO-DPMNE-së, se në cilat dikastere do të ketë ndryshime kadrovike në kuadër të rikonstruksionit të Qeverisë. Siç njoftoi Mickoski, partia VLEN do të marrë Ministrinë e Drejtësisë, Ministrinë e Kulturës dhe Turizmit dhe Ministrinë e Marrëdhënieve Ndërmjet Bashkësive.
Sipas informacioneve që qarkullojnë në media, Zoran Ljutkov do të zëvendësohet nga Sedat Sulejmani, i cili paraprakisht ishte zëvendësministër në të njëjtin dikaster.
Ministri i ri i Marrëdhënieve Ndërmjet Bashkësive do të jetë Agon Ferati, ndërsa kuadri i ZNAM në Drejtësi, Igor Filkov, do t’ia lërë postin ministror Jeton Shasivarit, profesor i së drejtës kushtetuese në Universitetin e Evropës Juglindore (UEJL).
Partneri i koalicionit VLEN, pas rikonstruksionit të Qeverisë, do të ketë një pozicion zëvendëskryeministri.
Bekim Sali mbetet zëvendëskryeministri i parë dhe ministër i Çështjeve Evropiane.
Pozicioni i zëvendëskryeministrit për qeverisje të mirë, të cilin e mbante Arben Fetai nga VLEN, nuk do të ekzistojë në qeverinë e rikonstruktuar. Ky funksion do të mbulohet nga kryeministri.
Siç njoftoi Mickoski mbrëmë, partia kryesore në koalicion, VMRO-DPMNE, po merr ministritë e shëndetësisë dhe politikës sociale, demografisë dhe rinisë përmes rikonstruksionit. Partia propozon drejtorin aktual të Fondit të Sigurimeve Shëndetësore (FSSH), Sasho Klekovski, si ministër të Shëndetësisë, ndërsa zëvendësministri aktual në këtë dikaster, Gjoko Velkovski, propozohet për politikë sociale, demografi dhe rini. Ministri aktual i Vetëqeverisjes Lokale nga VMRO-DPMNE, Zllatko Perinski, do të emërohet për të zëvendësuar Klekovskin në FSSH, ndërsa zëvendëskryeministri aktual dhe ministri i Marrëdhënieve Ndërmjet Bashkësive, Ivan Stoilkoviq, propozohet si Ministër i ri i Vetëqeverisjes Lokale.
Lëvizja ZNAM, pas humbjes ndaj Drejtësisë, do të drejtojë Ministrinë e Bujqësisë, Pylltarisë dhe Ekonomisë së Ujërave, ku pritet që kreu i ri të jetë Borçe Serafimovski, i cili aktualisht është sekretar shtetëror në të njëjtën ministri.
Goran Minçev nga ZNAM do të vazhdojë të drejtojë Ministrinë e Administratës Publike.