Këshilltarët e Komunës së Tetovës që vijnë nga BDI-ja kanë reaguar sot në lidhje me zhvillimet e fundit që po zhvillohen në hapësirat e “Monopolit” në hyrje të Tetovës, transmeton Portalb.mk.
“Aty ku në vitin 1944 u grumbulluan mbi 10 mijë shqiptarë dhe mijëra të tjerë u masakruan, sot gërmohet pas asnjë kontroll ligjor, pa u përkujdesur fare për historinë e qytetit tonë”, deklaroi Liridon Disha nga BDI-ja.
Ai theksoi se krimi dhe korrupsioni s’kanë të ndalur, duke vlerësuar se për interesa personale e shitën historinë më të dhimbshme të Tetovës.
“Monopoli i vjetër i Tetovës, një vend i njohur për historinë e tij për shqiptarët është shndërruar në kantier ndërtimi për ndërtesa banimi, kjo përmes pazari të dyshimtë dhe korruptiv ku prona u ble për vetëm 7 mijë euro u rishit për 5 milionë euro”, deklaroi Disha.
Ata kërkojnë urgjentisht ndërprerje të punimeve pa praninë e autoriteteteve shtetërore.
Ka qenë në dorë të udhëheqësisë aktuale të komunës së Tetovës që të vendosë nëse tek ish-Monopolli do të ndërtohen banesa ose jo, kryetari i komunës Bilall Kasami nuk është tërësisht i sinqertë kur thotë se gjithçka është ‘gatuar’ më herët. Ai gjithashtu ka pasur mundësi të pezullojë Planin Detal Urbanistik e përgatitur në kohën e Teuta Arifit ose të privatizojë tokën shtetërore pas ri-destinimit në zonë për banim kolektiv.
Kujtojmë që hulumtimi i Portalb-it zbuloi se investitorit drita e gjelbër për ndërtim të banesave në një procedurë jotransparente i ishte dhënë nga shumica aktuale e Këshillit Komunal, e përbërë nga VLEN-VMRO. Aktivistët kritikojnë.
Portalb-i bisedoi edhe me pronarin aktual të ish-Monopollit, ai e konfirmoi se aty pritet të ndërtohen katër objekte për banim ndërsa theksoi se gjithë hapësirën e ish-Monopollit e ka blerë nga ‘Tetovo Tabak’ për afër gjashtë milionë euro. Ai e ka blerë dhe tokën përreth me çmim më të lirë katër ditë para se Këshilli Komunal të ndryshojë destinimin nga zonë industriale në zonë për banim kolektiv.
- LEXO: Rasti i Monopollit: Ka qenë në dorë të Kasamit të vendosë nëse aty do të ndërtohen banesa, apo jo
- LEXO: ‘Tragjedi urbane’: Tetova mbeti e betonizuar dhe pa park, Komuna nuk ka zgjeruar hapsirat e gjelbra
- LEXO: Hulumtim: Çfarë pritet të ndërtohet tek ish-Monopolli i Tetovës, a e shiti Kasami për pak para pronën publike?
- LEXO: ASh-Sela: Kasami manipuloi procesin e shitjes së parcelës së ish-Monopolit, dëmtoi buxhetin e Tetovës me 2.1 milionë euro