Eurokomisionerja për Zgjerim, Marta Kos, thotë se Maqedonia duhet t’i bëjë ndryshimet kushtetuese me të cilat bullgarët do të përfshihen në Kushtetutë, si kusht për vazhdimin e procesit të eurointegrimit. Në një intervistë për BNT, në pyetjen se si mund të ndikojë te Shkupi që t’i bëjë ndryshimet kushtetuese, Kos tha se beson se me qeverinë e re bullgare do të gjendet një mënyrë që procesi me Maqedoninë e Veriut të vazhdojë, transmeton Portalb.mk.
“Unë besoj te qeveria e re bullgare, me të cilën punojmë shumë mirë. Të gjithë së bashku do të gjejmë një mënyrë për ta çuar përpara procesin me Maqedoninë e Veriut”, tha Kos.
Ajo shtoi se Qeveria e Maqedonisë së Veriut duhet ta përmbushë premtimin dhe ta ndryshojë Kushtetutën.
“Ata duhet ta ndryshojnë Kushtetutën, kjo është dakorduar mes Maqedonisë së Veriut dhe 27 vendeve anëtare të BE-së. Pasi kjo të bëhet, do të llogaris edhe në mbështetjen e vendit tuaj që të vazhdojmë përpara edhe me Maqedoninë e Veriut”, deklaroi Kos.
Sa i përket procesit të zgjerimit, Kos theksoi se Mali i Zi është më pranë anëtarësimit, ndërsa për Shqipërinë, Moldavinë dhe Ukrainën po përgatiten udhërrëfyes me hapat e mundshëm teknikë deri në përfundimin e mandatit të Komisionit Evropian.
Ajo vlerësoi se përparimi i dy vendeve të Ballkanit Perëndimor mund t’i motivojë edhe Maqedoninë e Veriut, Bosnjë e Hercegovinën dhe Kosovën që të ecin përpara.
Kujtojmë se Maqedonia e Veriut duhet t’i bëjë ndryshimet kushtetuese për të ecur përpara në rrugën eurointegruese.
Ato nënkuptojnë përfshirjen e bullgarëve dhe etnive tjera në Kushtetutë.
Kjo vjen si rezultat i asaj që Maqedonia e Veriut pas 17 vitesh me 19 korrik të vitit 2022 filloi bisedimet qasëse me BE-në me mbajtjen e konferencës së parë ndërqeveritare, pas miratimit të propozimit francez të cilin Maqedonia e Veriut e miratoi më 16 korrik 2022.
Propozimi atë kohë u votua në parlament pa pjesëmarrjen e opozitës së atëhershme e cila tani është në pushtet.
Ndryshimi i Kushtetutës kërkon shumicë prej dy të tretash.
Negociatat me BE-në nuk do të fillojnë derisa të bëhen ndryshimet kushtetuese.
- LEXO: Rokas: Von der Leyen do ta vizitojë rajonin, shpresoj që vizita të jetë vendimtare për integrimin evropian të vendit
- LEXO: Ministrja austriake për Evropën: Propozimi për ndryshime kushtetuese me efekt të vonuar meriton shqyrtim serioz
- LEXO: Mucunski thotë se Qeveria po punon për zgjidhje të përhershme për zhbllokimin e eurointegrimeve, por nuk zbuloi detaje
- LEXO: Mickoski: Nuk do të lejoj ndryshime kushtetuese të tilla siç kërkon Bullgaria, por do të vazhdojmë bisedimet