Ligjet për arsimin e lartë në Kuvendin e Maqedonisë së Veriut, opozita me vërejtje të shumta

“Unë mendoj se shumica parlamentare me tendencë e ka përcaktuar këtë periudhë duke pasur qëllimin përfundimtar që pak a shumë të na shpërqendroj nga puna dhe që të mos jemi të vëmendshëm me atë që ata duan ta kalojnë me patjetër”, tha Rina Ajdari, deputete e Frontit Evropian.

Zëvendësministri i Arsimit, Driton Sulejmani tha se pakoja e ligjeve të arsimit të lartë duhet miratuar, duke theksuar se ajo synon të rrisë cilësinë e arsimit të lartë dhe standardet akademike.

“Përfitime do të kenë edhe studentët. Për shembull, një përfitim që mund ta kenë studentët është studentët më të mirë që do të zgjidhen nëpër fakultete do ta kenë mundësinë menjëherë të punësohen nëpër institucionet e arsimit e të lartë. Edhe çështja e financimit do të përmirësohet në këtë rast përmes ligjit të ri. Universitetet që do të performojnë më mirë do të kenë mundësinë që të kenë më shumë mjete financiar”, theksoi Driton Sulejmani, zëvendësministër i arsimit.

Pakoja e propozim ligjeve për arsim të lartë, për sigurimin e cilësisë në arsimin e lartë dhe shkencë, si dhe për veprimtarinë kërkimore shkencore zhvillohet me procedurë të rregullt dhe duhet të kalojë të gjitha fazat e debatit parlamentar.

Qeveria e Maqedonisë së Veriut më 22 prill e ka miratuar versionin final të paketës së tre ligjeve që lidhen me arsimin e lartë, përfshirë Ligjin për arsimin e lartë, Ligjin për cilësinë në arsimin e lartë dhe atë për hulumtimet shkencore.

Projektligji për arsimin e lartë, i cili supozohet të zëvendësojë zgjidhjen aktuale ligjore, u prezantua nga Janevska më 6 shkurt të këtij viti. Disa nga risitë e publikuara deri më tani kanë shkaktuar reagime në komunitetin akademik, por edhe nga partitë politike të opozitës, disa prej të cilave kanë kërkuar tërheqjen e ligjit të ri. Zgjidhja e re ligjore është tani cak i kritikave nga partitë opozitare, veçanërisht nga Lidhja Social Demokrate, e cila sheh në të elementë që do të ishin të dëmshëm për sistemin e arsimit të lartë në vend.

• LEXO: Qeveria e miratoi paketën për ligjet kontroverse të arsimit të lartë, Sali: ndryshimet ishin të domosdoshme
• LEXO: Ligji për Arsim të Lartë do të hyjë në procedurë qeveritare, MASH dhe VLEN patën dje diskutimet e fundit
• LEXO: Ligjet e arsimit të lartë në këtë formë do të shkaktojnë dëme të pariparueshme, reagoi Sindikata e Pavarur Akademike
• LEXO: Universitetet shqiptare e demantuan Janevskën: Asnjë profesor i joni nuk ka marrë pjesë në hartimin e Propozim-ligjit për Arsimin e Lartë
• LEXO: Ligj publik, autorët sekret: Ministra e Arsimit vazhdon t’i fshehë emrat që e hartuan Propozim-ligjin për Arsimin e lartë