Në Kuvendin e Maqedonisë së Veriut, me 80 vota “për” në seancën e 64-t u miratua Ligji për institucionet e arsimit të mesëm të bashkësive fetare. Ata e konsiderojnë këtë “hap gjigant”, transmeton Portalb.mk.
“Ky është një moment i artë për arsimin fetar dhe për barazinë arsimore në vendin tonë. Nga shtatori 2025, nxënësit e Medresesë “Isa Beu” do të gëzojnë të njëjtat të drejta, privilegje dhe status si maturantët e të gjitha shkollave të mesme të akredituara në vend”, deklaruan nga Medreseja “Isa Beu”.
Ata e vlerësojnë si “ditë historike” për Medresenë, duke falënderuar institucionet dhe individët që kanë kontribuar në finalizimin e këtij procesi.
“Me këtë, Medreseja “Isa Beu” në Shkup akreditohet dhe barazohet me të gjitha shkollat e mesme në vend, dhe diplomat e nxënësve dhe nxënëseve të kësaj shkolle tashmë pranohen zyrtarisht”, deklaruan nga BFI-ja.
Përmes këtij ligji, nxënësit e shkollave të mesme fetare do të mund të kalojnë maturën shtetërore dhe të regjistrohen në universitetet e vendit, njëjtë si nxënësit tjerë.
Ndryshe, Rrjeti për Mbrojtje nga Diskriminimi i ka kërkuar Kuvendit të Maqedonisë së Veriut të mos votojë për projektligjin për institucionet e arsimit të mesëm të komuniteteve fetare, sipas tyre ligji është jokushtetues dhe ligjërisht i papajtueshëm, duke cenuar karakterin sekular të shtetit.
Më 15 korrik në seancën qeveritare u miratua ligji pë shkollat e mesme, ligj që njeh diplomën e medresesë. Ata presin që ky propozim-ligj të miratohet edhe në Kuvendin e RMV-së.
Gjykata Kushtetuese më 30 prill hodhi poshtë Vendimin për dhënien e miratimit për themelimin e Shkollës së Mesme Private “Medreseja Isa Beu” – fshati Kondovë, Shkup, i cili u miratua nga Qeveria më 26 mars 2024. Gjykata vendosi se vendimi i Qeverisë ishte i paligjshëm dhe jokushtetues, sepse Qeveria kishte dhënë pëlqimin e saj, përkatësisht i kishte lejuar Bashkësisë Fetare Islame BFI të jetë themeluese e një shkolle të mesme-gjimnaz.
Ministrja për arsim dhe shkencë, Vesna Janevska, vitin e kaluar kishte deklaruar se maturantët e kësaj medrese nuk do të mund të regjistrohen në fakultetet tjera. Më 26 mars të vitit 2024, ministri për Arsim dhe Shkencë në Maqedoninë e Veriut, Jeton Shaqiri, kishte njoftuar që problemi me mosnjohjen e diplomave për nxënësit e “Medresesë Isa Beu” ishte zgjidhur nga Qeveria. Medresantët paraprakisht kishin reaguar disa herë duke kërkuar që shteti t’ua njeh diplomat që të mund të regjistrohen në universitetet në vend.
- LEXO: Ligji për shkollat e mesme fetare në RMV, Rrjeti për Mbrojtje nga Diskriminimi reagoi ndaj institucioneve
- LEXO: Në Qeverinë e Maqedonisë së Veriut u miratua ligji që njeh diplomën e Medresesë “Isa Beu”, njoftoi BFI-ja dhe Qeveria
- LEXO: Mexhiti premtoi zgjidhje për medresantët për regjistrim në universitetet publike të vendit
- LEXO: Gjykata Kushtetuese rrëzoi vendimin e qeverisë që BFI të hapë shkollën e mesme Medresenë “Isa Beu” në Shkup