Zëvendëskryeministri i parë dhe ministri i Mjedisit dhe Planifikimit Hapësinor, Izet Mexhiti, informoi se po punohet mbi propozimet për ministrat dhe se ato do t’i dorëzohen Qeverisë në ditët në vijim. Siç theksoi Mexhiti, lista po plotësohet me anëtarë të Qeverisë, zëvendës dhe pozicione të tjera, transmeton Portalb.mk.
Zëvendëskryeministri i parë beson se Azir Aliu është propozimi më i mirë për ministër të Shëndetësisë dhe se drejtori i ri i Qendrës për Menaxhim të Krizave nga VLEN mund ta tejkalojë ritmin e punës së Stojançe Angelovit.
“Lista po plotësohet këto ditë me anëtarë të Qeverisë, zëvendës dhe pozicione të tjera. Po punojmë për këtë, propozimet do të dorëzohen në ditët në vijim. Lidhur me Aliun, mendoj se ai është propozimi më i mirë për atë pozicion. Një ministër duhet të jetë menaxher i mirë që e njeh sistemin dhe që mund të kontribuojë në përmirësimin e departamentit. Mendoj se Aliu është propozimi më i mirë për atë pozicion”, theksoi Mexhiti pas promovimit të projektit Avant2Go.
Mexhiti informoi gjithashtu se dje 10 anëtarë të Aleancës për Shqiptarët, të udhëhequr nga Arben Fetai, iu bashkuan kryesisë së VLEN-t. Në mbledhjen e mbrëmshme të kryesisë qendrore të partisë, Adnan Azizi u zgjodh kryetar i selisë qendrore. Ai dha detaje mbi ekipin e formuar dhe hapjen e selive në të gjitha qytetet ku VLEN po kandidon për zgjedhjet lokale.
Nga ana tjetër, kryetari i Kuvendit Afrim Gashi tha shumica mbetet stabile, Qeveria dhe shumica parlamentare do të punojnë me kapacitet të plotë, pas vendimit të ministrit të Shëndetësisë Arben Taravari nga Aleanca për Shqiptarët për t’u larguar nga koalicioni qeveritar
“Shumica është stabile. Nuk ka dilemë nëse kemi shumicë, bëhet fjalë për kalimin e njërës prej partive politike në opozitë, por e shihni që disa deputetë mbeten pjesë e VLEN. Mendoj se Qeveria dhe shumica parlamentare do të punojnë me kapacitet të plotë”, tha Gashi, duke iu përgjigjur pyetjeve të gazetarëve.
I pyetur se kur do të zgjidhet ministri i ri i Shëndetësisë, kryetari i Kuvendit u përgjigj se kryeministri duhet të propozojë fillimisht ministrin e ri, ky propozim duhet të vendoset në rend të ditës dhe më pas do t’u paraqitet të gjithë anëtarëve të Parlamentit.
“Siç e dini, si me ligj ashtu edhe me Rregulloren e Punës, propozimi vjen nga Qeveria. Kryeministri duhet të propozojë një ministër të ri. Kur propozimi të jetë në rend të ditës, ai propozim do t’u paraqitet menjëherë të gjithë deputetëve në Kuvend dhe ne do ta paraqesim atë në seancën e parë të radhës”, theksoi Gashi.
Zëvendëskryeministri i parë dhe Ministri i Mjedisit dhe Planifikimit Hapësinor Izet Mexhiti, mbrëmë para seancës së Kryesisë Qendrore të VLEN, njoftoi se Azir Aliu do të jetë propozimi i tyre për Ministër të ri të Shëndetësisë, pas dorëheqjes së Arben Taravarit dhe vendimit të tij për të kaluar në opozitë, dhe se Arben Fetai do të përfshihet në udhëheqjen e partisë dhe do të mbetet Zëvendëskryeministër për Qeverisje të Mirë.
Ndryshe turbulencat në koalicionin VLEN dhe në Qeveri u shkaktuan nga krahu i Aleancës për Shqiptarët në partnerin qeveritar VLEN, kur kjo e fundit vendosi të dilte me listat e veta të këshilltarëve në zgjedhjet lokale në tetor.
Kjo nuk u pranua nga partnerët e tij të koalicionit në VLEN. Kjo u pasua nga largimi i Taravarit nga koalicioni VLEN, dhe në publik lindën spekulime se ai po negocionte me kreun e Bashkimit Demokratik për Integrim (BDI), Ali Ahmeti.