Të hënën në mëngjes, doganierët grekë në pikat kufitare do të mbajnë grevë, gjë që pritet të rrisë edhe më tej radhët e gjata të krijuara tashmë për shkak të sistemit të ri të Bashkimit Evropian për hyrje dhe dalje (EES), transmeton Portalb.mk.
Siç njofton Ministria e Punëve të Brendshme (MPB), greva do të zhvillohet nga ora 05:00 deri në 09:00, sipas orës së Maqedonisë.
“Ministria e Punëve të Brendshme i njofton qytetarët se, sipas informacioneve të marra nga organet kompetente të Republikës së Greqisë, më 27.07.2026 (e hënë) është paralajmëruar grevë e nëpunësve doganorë në pikat kufitare greke Evzoni (Bogorodicë), Dojrani (Dojran) dhe Niki (Mexhitli).
Në periudhën 05:00–09:00 sipas orës së Maqedonisë (06:00–10:00 sipas orës së Greqisë), në këto pika kufitare automjetet e udhëtarëve do të lejohen të kalojnë çdo 10 minuta, ndërsa qarkullimi i automjeteve të mallrave do të jetë plotësisht i ndërprerë, si në hyrje ashtu edhe në dalje nga Republika e Greqisë”, njoftoi policia e Maqedonisë.
Nga MPB bëjnë të ditur se do të ndërmerren të gjitha masat e nevojshme dhe se do të angazhohen të gjitha kapacitetet njerëzore dhe teknike për menaxhimin e situatës.