Eksperti evropian Kelam për Maqedoninë: Prioritet janë reformat në gjyqësor dhe të kontrollohet korrupsioni
“Reformat më të rëndësishme janë reformat në gjyqësor, të ketë kontroll ndaj korrupsionit”, kështu ka deklaruar shefi i Komisionit për Punë të Jashtme të Parlamentit Evropian, Tune Kelam, transporton Portalb.mk.
Sa i takon rrjedhës së procesit të përshtatjes së legjislaturës që Maqedonisë me atë të Evropës, Kelam është shprehur i prerë, se “Reforma më e madhe që i duhet Maqedonisë së Veriut, është implementimi i ligjeve”.
Eksperti evropian, Tune Kelam ka njoftuar se partia opozitare VMRO-DPMNE do të bashkëpunojë sa i takon realizimin të reformave, dhe se do ta rikthejë angazhimin në kuadër të dialogut “Zhan Mone”-së.
“Kemi folur edhe me Qeverinë, dhe me opozitën. Edhe ata e kanë theksuar realizimin e reformave. Lajmi i mirë është se opozita është e hapur të bashkëpunojë në parlament, dhe në dialogun Zhan Mone, i cili për fat të keq u ndërpre, por jo përgjithmonë”, tha Kelam.
Sipas Kelamit, i vetmi problem brenda strukturës së Bashkimit Evropian, është se nuk u është kushtuar vëmendje çështjes së emigracionit, i cili ndikoi identitetin dhe kulturën e kombeve evropiane.
Përndryshe, Kelam e vizitoi Maqedoninë e Veriut si pjesë e delegacionit të Parlamentit Europian, gjatë së cilës, me gjashtë anëtarët të tjerë të Komisionit për Punë të Jashtme të Parlamentit Evropian, realizuan takime me përfaqësuesit e partive politike, Qeverisë dhe të sektorit civil.
