Pollozhani thotë se brenda tre vjetëve do të jetë gati objekti i UNT-së

“Të gjitha hapat që kanë qenë të planifikuara disa janë aplikuar kurse disa të tjera janë në aplikim të sipërm. Siç është paraparë, objekti duhet të jetë gati brenda 3 vjetëve dhe është në procedurë për tenderim. Ashtu siç kemi thënë nga shtatori presim të vihet themeli dhe kështu kjo çështje do të zgjidhet”, bëri të ditur rektori i Universitetit “Nënë Tereza” Aziz Pollozhani, në lidhje me çështjen e zgjidhjes së pronësisë së UNT-së, gjatë shënimit të 130 vjetorit të shkollës së parë shqipe dhe një vjetorit të themelimit të UNT-së në Qendrën Informative Kulturore (QIK), raporton Portalb.mk.

Krahas mungesës së objektit vetanak të UNT-së, ai bëri të ditur se tashmë kanë siguruar objekt shtesë ku do të zhvillohen studimet e këtij universiteti. Tashmë me katin e ri të siguruar në objektin e sindikatës UNT do të ketë në përdorim gjithsej tre kate, krahas kësaj ato do të kenë në shfrytëzim edhe një pjesë të Shkollës Fillore “Kongresi i Manastirit”.

“Ne kemi siguruar edhe një kat shtesë tek objekti i Sindikatës dhe kjo do të jetë e mjaftueshme për studimet e deritanishme aktive, por gjithashtu nga shtatori do të shfrytëzojmë edhe hapësirat e objektit të Shkollës Fillore “Kongresi i Manastirit”. Tash për tash po investojmë në laboratore të cilat do të jenë të standardizuara”, tha Aziz Pollozhani.

Duke e pasur parasysh se UNT-ja do të zhvillojë programe studimore në tri gjuhë, sërish rektori Pollozhani nuk deshi të komentojë protestën e simptizantëve të VMRO-së, me arsyetimin se për të duhet të përgjigjen politikanët.

“Pyesni politikanët, un këtu jam për arsim”, u shpreh Aziz Pollozhani.

Përndryshe, sot në Qendrën Kulturore Informative në Shkup u mbajt aktiviteti i shënimit të 130 vjetorit të shkollës së parë shqipe dhe një vjetorit të themelimit të UNT-së. Gjatë kësaj ngjarje fjalim rasti patën Fatos Reka ambasador i Shqipërisë në Maqedoni, Avzi Mustafa veteran i arsimit, profesori Agim Rushiti, rektori i UNT-së Aziz Pollozhani dhe ministri i Arsimit dhe Shkencës Pishtar Lutfiu.

Ky manifestim u organizua nga Universiteti “Nënë Tereza”.