Unifikimi i teksteve shkollore me Shqipërinë, ende ëndërr e parealizuar!

Gabimet skandaloze që hasen në tekstet e tanishme shkollore, dhe që janë të natyrës së  ndryshme, duke filluar nga gabimet gjuhësore, konceptuale e deri te fyerjet, si duket  do të vazhdojnë të jenë prezent edhe gjatë vitit tjetër shkollor pasi që deri më tani nuk ka ende asgjë konkrete lidhur me unifikimin e teksteve me Shqipërinë dhe as me përmirësimin e tyre.

Nga MASH thonë se ende nuk diçka të re lidhur me këtë problematikë.

“Nuk ka ende asgjë konkrete sa i përket unifikimit të teksteve shkollore me ato të Shqipërisë”, thonë për Portalb, nga zyra për informim e MASH-it.

Samet Jahiji, kryetar i Lidhjes së Arsimtarëve Shqiptarë, dega Kumanovë, thotë se deri më tani duhej të ndërmerret një hap i tillë, pasi që gabimet hutojnë nxënësit si dhe shtrembërojnë historinë.

“Librat kanë gabime skandaloze, duke filluar nga përkthimi e deri tek përmbajtjet fyese dhe të shtrembëruara. Një gjë e tillë duhet të ndalohet se mësimdhënësit nuk dinë se çfarë të ligjërojnë sepse këto libra janë në plan program. Ata detyrohen të krijojnë vetë materiale të sakta dhe verifikuara, por prapë nxënësit hutohen me ato që shkruan në libra”, tha për Portalb, Jahiji.

Ai shtoi se sidomos unifikimi i Abetares është i domosdoshëm.

“Probleme me libra kemi tani më një kohë të gjatë, LASH e Kumanovës edhe më herët ka theksuar se unifikimi i teksteve shkollorë duke filluar nga abetarja, do të ishte një zgjidhje e përhershme e problemeve tona”, shtoi Jahiji.

Ndërkaq kohë më parë kryetari i LASH-it në Maqedoni, Nuhi Dardhishta  foli për librat e Kembrixhit, të cilat u cilësuan si zgjidhje e problemit të gabimeve në tekstet shkollore, nga ana e MASH, dhe tha për Portalb se autorët shqiptarë janë të bllokuar nga vetë fakti se këto marrëveshje kanë mbyllur konkurset e autorëve vendas.

“Ky është një lloj diskriminimi si për neve shqiptarët ashtu edhe për maqedonasit. Pse të merren libra nga jashtë? Ata ndoshta janë shumë të mirë mirëpo neve nuk kemi kushte që të punojmë me to. Shkaku i këtyre marrëveshjeve, MASH ka mbyllur konkurset për autorët dhe në këtë mënyrë askush nuk mundet të jep programet e tyre të cilat mund t’i kenë realizuar në tekst shkollor”, theksoi Dardhishta.

Ndërkaq ish ministri i Arsimit dhe Shkencës së Republikës së Maqedonisë, Abdilaqim Ademi, i cili kohë më parë qëndroi për vizitë në Republikën e Shqipërisë, ku është pritur nga ministrja e Arsimit dhe Sportit të Republikës së Shqipërisë, Lindita Nikolla, me ç’rast u bisedua për Bashkëpunim në sferën e arsimit mes Shqipërisë dhe Maqedonisë, askund nuk përmendet ndonjë unifikim i teksteve shkollore çoftë edhe i Abetares.

LEXO MË SHUMË:

Dibër: Prindërit të indinjuar me arsimtarët për tekstet shtesë

Pa aftësia e komisionit le nxënësit me tekste anti shqiptare

Abetarja e Unifikuar, shqiptarët e Maqedonisë mund ta shohin vetëm në ëndërr

Edhe këtë vit do të mësojnë me librat e shkatërruar

Librat e Kembrixhit aspak nuk janë të përshtatshme për Maqedoninë

Kembrixhi, librat e vjetërsuara dhe gabimet skandaloze do të shoqërojnë nxënësit këtë vit