Krahasimi: Maqedonasit pushtetarë realizojnë, shqiptarët premtojnë
Kohë më parë u miratua ligji që në Shkup do të hapet Universiteti i ri “Nënë Tereza” i cili do të fillojë të funksionojë gjatë vitit akademik 2016/2017, hapësira e ish kazermës e cila iu premtua si objekt, ende nuk ka filluar të adaptohet apo të ndërtohet objekt i ri.
Ndërkaq në hapësirat e Universitetit të Shën Kirilit dhe Metodit, ka filluar ndërtimi i dy objekteve për fakultetin e shkencave të informatikës, kompjuteri dhe inxhinierisë, si dhe për fakultetin e edukatës fizike.
Në këto fotografi të realizuara nga Portalb shihet se po punohet në mënyrë intensive në ndërtimin e objektit, ndryshe nga ndërtimi i objektit për Universitetin e ri shqiptar në Shkup.
Ministri i Arsimit dhe Shkencës, Abdilaqim Ademi bëri të ditur se përderisa të ndërtohet objekti i ri te ish kazerma Ilinden, studentët e universitetit te ri do të mësojnë në hapësirat që shfrytëzon USHT me studimet e disperzuara në Shkup.
Profesorët dhe studentët shprehen të habitur me vetë faktin që për shkak të mungesës së hapësirë shumë programe studimore janë lënë në pauzë, dhe nuk e kanë të qartë se ku do të vendosen studentët e rinj.
“U habita me atë që dëgjova, ne këtu po ballafaqohemi me mungesë të hapësirës dhe programet studimore vazhdojnë të jenë në pauzë, kurse tani duan të sjellin universitet te ri. Është e palogjikshme. Ta shohim se si do të shkojnë punët”, tha për Portalb, një profesor i USHT-së i cili nuk deshi të prononcohet me emër.
Studentët kohë më parë u ankuan se nuk kanë ngrohje, se disa kolegë të tyre u detyruan të vazhdojnë studimet në Tetovë ngase këtu nuk kishte kushte, habiten si do të funksionojnë dy universitete dhe një shkollë fillore në një objekt.
Ndërkaq ish ministri i arsimit, Sulejman Rushiti shprehet skeptik, duke thënë për Portalb se MASH nuk ishte në gjendje të pastron librat në shkolla, kurse tani premton objekt dhe universitet të ri shqip.
“Duke u nisur nga premtimet e parealizuara në tre ciklet e fundit zgjedhore, duke u nisur nga fakti se po e njëjta parti e legalizoi vetëm çerekun e UT-së në USHT( vetëm 30 programe studimore ne vitin 2004, që pastaj ti akreditoj edhe 63 drejtime ne 2007 dhe të siguroj për herë të parë buxhet për ndërtimin e objekteve) dhe në atë proces nuk ndau asnjë lek për ndërtim të objektit por i shfrytëzoi ato që u ndërtuan nga populli, duke u nisur nga fakti që e njëjta konjukturë politike nuk i pastron dot librat nga përmbajtjet ofenduese ndaj shqiptarëve, nuk i ndryshon dot tri emra shkollash, nuk siguron dot nxehje për nxënësit e për studentët, sigurisht që jam skeptik edhe për këtë premtim. Madje edhe deklaratat kontradiktore nga ministri i arsimit dhe kryeministri e shtojnë drojën”, tha Rushiti.
LEXO MË SHUMË:
UT ngelet pa ‘hise’ në ish kazerëm e Ilindenit!
Mexhiti: Kazerma “Ilinden”, zgjidhje afatgjate për USHT-në
Objekti i ri i USHT-së, një zgjidhje afatgjate?
Do të ndërtohen dy fakultete në stilin barok?
Fenomeni USHT: Studentët dhe filloristët bashkë! (Foto)
Arshinet e dyfishta: realiteti i USHT dhe Shën Kirili dhe Metodit
Komuna Çair: Po përpilojmë planin për USHT