Kryeparlamentari Xhaferi prej Turqisë: investimet në Maqedoni mbrohen me ligje

Në kuadër të vizitës zyrtare të kryetarit të Kuvendit të Maqedonisë, Talat Xhaferi në Republikën e Turqisë është realizuar darkë pune mes tij dhe kryetarit të Këshillit Afarist në Turqi – Maqedoni, Bilal Kara ku u njoftua për kushtet që ofron Maqedonia për investuesit e huaj, për të cilat u tha se mbrohen me ligje, njofton Portalb.mk.

“Kjo përbërje mahnitëse e përfaqësuesve të biznesit vetvetiu flet për faktin se Maqedonia është vend konkurrent për biznes që ofron kushte me të vërtetë të volitshme për investitorët e huaj dhe investimi i të cilëve është i mbrojtur me ligjet në fuqi të cilat me ndryshimet e fundit ofrojnë kushte të barabarta për të gjithë investuesit, ato të huajt dhe ato vendorë. Përveç rregullores ligjore, një nga faktorët më të rëndësishëm për atraktivitetin e vendit është stabilizimi pas një krize më të gjatë politike, ndërsa marrja e Progres raportit pozitiv, të pakushtëzuar, dinamika dhe aktiviteti i zmadhuar në drejtim të marrëdhënieve të mira fqinjësore janë gjithashtu në favor të këtij atraktiviteti për investim”, tha Xhaferi në takim.

Ndërkaq, Bilal Kara ka treguar se qëllimi i Këshillit është që të informohet sipërmarrësit për mundësitë që ofron Maqedonia.

“Qëllimi i Këshillit Afarist Turqi – Maqedoni i Bordit për Marrëdhënie të Jashtme Ekonomike (DEİK), është ta informojë sektorin privat në Turqi për mundësitë për investim në Maqedoni dhe për politikat e reja ekonomike ndaj investimeve të huaja dhe pikërisht për këtë ky takim është i rëndësishëm, për arsye se bashkëpunimi ekonomik ndërmjet dy vendeve duhet ta përcjellë shembullin e marrëdhënieve të shkëlqyera politike. Aktualisht, Turqia është në vendin e gjashtë prej top 20 vendeve me hyrjet e përgjithshme në Maqedoni”, tha Kara.

Por sipas asaj që u tha nga Kara, për Turqinë mbetet sfidë arritja e këmbimit tregtar deri në një miliardë dollarë amerikanë në vit.

Kryetari i Kuvendit, Xhaferi ka shprehur se  Parlamenti dhe Qeveria do të bëjnë çmos për ta lehtësuar bashkëpunimin ekomomik – në favor të së cilit është afërsia gjeografike, ndërlidhja e mirë infrastrukturore me vendet fqinje a risi është edhe linja më e re ajrore ndërmjet Maqedonisë dhe Turqisë.

Në darkë ishin të ftuar përfaqësues të kompanive që veç më janë të pranishme me përfaqësi të veta të suksesshme në Republikën e Maqedonisë dhe kompani që janë të interesuara ta zgjerojnë biznesin e vet në Maqedoni dhe në rajon, të udhëhequra nga eksperiencat pozitive të të tjerëve.

Talat Xhaferi ka qenë i shoqëruar edhe nga Vesel Memedi, nënkryetar i Kuvendit, Enes Ibrahim, kryetar i Grupit parlamentar për bashkëpunim me Parlamentin e Republikës së Turqisë dhe Jusuf Hasani, anëtar i Grupit parlamentar për bashkëpunim.

Leave a Reply

Your email address will not be published.

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

*

VERZIONI DESKTOP